Халкьдин манияр

Ичин тарар са жергеда

Чуьхвер тарци вуч лугьуда?

Суна, куь руш гваз хъфейла,

Рушан дидед вуч лугьуда?

 

Тик гуьнедай гьикI экъечIда,

Пеле кьадай гар авачир.

ЧIур хьай хуьруьз гьикI хъфида,

РикIиз кIани яр авачир.

 

ПIинид тарци цуьк ахъайна.

Цуьк ахъайна, пеш галачиз.

Зулун йифер гьикI акъудда,

РикIиз кIани яр галачиз.

 

Агъа багъдай вини багъдиз

Жагъанач заз недай келем.

ПIапIрусдилай цIай аватна,

Кана ярдин агъдин перем.

 

Гъилихъ галай къизилд тупIал,

Гьар жуьредин къашар ава.

Чи Мурадаз гъизавай свас

Къизилгуьлдиз ухшар ава.

 

Зун и пата, вун а пата.

Къизил керпич арабада.

Вил вегьена килигайла,

Касни амач харапIада.

 

Гатфар йисан жегьил вахт я,

Безетмишда цуькверив чуьл.

Муьгьуьббатдиз вафалу хьухь,

Гатфар хьиз шад хьурай гуьгьуьл.

 

Зун пенжердай килигайла,

Шалбуз дагъдин кIан я вирер.

Буй виридаз авай затI я,

Заз кIаниди я ви вилер.

 

Цавай фидай айрупалан,

Ви моторда худ амани?

Чуьллеравай ширин бала,

Ви жибинда пул амани?

 

Я а патай фидай чувуд,

Вав гьулдандин рапар гвани?

Са виш манат пулни гуда,

Вав зи ярдин хабар гвани?

 

Хандин багъда ичер буллух,

Ичер буллух кьуразава.

Бегдин рушан буй акурла,

Къеневай рикI цIразава.

 

Хъархъу тарциз тIили къведа,

Адаз верхи кул ни гуда?

Лацу рушар гьинай къведа?

ЧIулав рушахъ пул гьикI гуда?

 

КIвалер кьулухъ бадамдин сал,

Яйлухдик кваз бадамар гъваш.

Зунни зи яр хъел хьанава,

Серин тавдиз далдамар гъваш.

 

Келегъадин къерехдавай,

Къерехдавай пешер къацу.

Чир хьайитIа кIани ярдиз,

Чайдихъ хъвадай шекер я зун…

КIватIайди — М.Майрам, «ЛГ»-дин 2020-йисан 33-нумрадай