Сагърай газет!
Вуч гаф ава а ви рекьиз,
Гьакьван чIехи, гьакьван михьи!
Ракъинин нур я чаз экуь!
Сагърай вун, чи “Лезги газет”.
КIелиз, рахаз чирзавай чаз,
Руьгь ийизвай аршдихъ хкаж,
Чи садвилин лайихлу ярж,
Сагърай вун, чи “Лезги газет”.
Акьул дерин, чIалаз верцIи,
Зайиф жедач зар ви цIарцIин,
Йисалай-суз жез вун хци,
Сагърай вун, чи “Лезги газет”.
Вун тахтайла жеда сефил,
Хада бегьем чанда гуьгьуьл.
Къвазнава чун, алаз вал вил,
Сагърай вун, чи “Лезги газет”.
Хайи халкьдин дамах я вун,
Дидед чIалан къаймах я вун,
Гьар са йикъан даях я вун,
Сагърай, сагърай “Лезги газет”.
Ви тариф гьикI ийидач къе,
Чи амадаг гьар са рекье.
Дережаяр хьуй мадни еке,
Сагърай, сагърай “Лезги газет”,
Лезги халкьдин гуьзгуь газет…
Хайи чIал
Дидеди заз чирай чIал,
Мана гьакьван дерин чIал,
Вун масан я, багьа я,
ВиртIедилай ширин чIал!
Вун зи чандин дамах я,
Гьар камуна даях я,
Зи берекат, гьерекат,
Ялав хуьзвай чахмах я.
Лезги женни чIал течир,
Адан лезет, звал течир.
Хуьх багьа яз, квадармир,
Адан чешме, хвал течиз.
Вун зи нефес, жигер я,
РикIин, руьгьдин бегьер я,
Цуьквераллай эмбер я,
Зи багьади — Лезги чIал,
Зи хцивал, верги чIал!..
Ярагъ-Къазмаяр
«Лезги газетдин» 2019-йисан 19-нумрадай
_________________________________________________________________________________
* * *
Дяведа телеф хьайи чантар — хуьруьнвийриз Куьребегов Эскендара эцигнавай гуьмбетдив
Чи бубаяр тир такабур,
Ватан хвенай, виликна хур,
Душмандиз куьне ганай кIур,
ВикIегьвилелд женг чIугунай.
Садрани куьн ажуз хьанач,
Садани куьне кьил агъузнач,
Душманд вилик шез акъвазнач,
Уьтквемвилелд гана чанар.
Рагьмет хьуй квез авай чкада,
Женнетдин цуьквед бахчада,
Земземдин яд хъваз хьуй куьне,
Къизил гичин кьуна гъиле.
Эскендара чIугур зегьмет —
Кьегьалриз я даим гьуьрмет.
Эбеди яз хуьз куь тIварар,
Замин жеда зурба гуьмбет.
Ярагъар
Шейх Мегьамедан ватан я,
Берекатрин мерд макан я,
Чаз виридаз вун масан я,
Гьикьван гуьрчег чи Ярагъар.
Дагъдин лекьер — ви рухваяр,
Гуьзел тушни хупI ви рушар!
Намус — гъейрат гвай инсанар,
Сагъвал керчек чи Ярагъар.
Гьамга хьтин чар-булахар,
Дагъдилай къвез къайи шагьвар,
Самур вацIув гвай дамахар,
Женнет я вун, чи Ярагъар!
ЧIехибуруз гьуьрмет авай,
Гьар са кIвале девлет авай,
РикIе намус — гъейрат авай,
Руьгьдин дестек чи Ярагъар.
Шагь-Эмиран мурад я къе,
Мад гьяркьуь хьуй ви мерд рекьер.
Терг хьуй вири къаяр-мекьер,
Абад уьстек чи Ярагъар.
«Лезги газетдин» 2021-йисан 31-нумрадай
