Шехьмир, диде

Вилерилай накъвар физва

Дидейрин,

Дерт-гъам хьанва дяведавай

Балайрин.

Гьикьван хьурай йикъар, йисар

Дявейрин?

РикI сефил яз, хажалат я дидейрин.

 

Къушар хьиз, куьн лув гана физ

Дяведиз,

Дертлу хьана, ахвар амач

Дидейриз.

Шехьдай кьадар ишигъ амач

Вилериз,

Экуь дуьнья мичIи хьанва

Бендейриз.

 

Фад алатрай чалай залум

Дявеяр,

Гьикьван тергда гуьзел жегьил

Невеяр?

Мад гьич шехьмир куьн, чи азиз

Дидеяр,

Ватан хуьзвай дяведава

Кьегьалар.

 

Хва рикIел къвез, накъвар физва

Вилелай,

Мус аквада лугьуз заз хва

Варцелай,

Шехьмир, диде, алхиш ая

Мецелай,

Хва хкведа ви и мукьвара

Дяведай.

 

Зи Къутунхъар

 

Билбилрин ван япа аваз,

Цуьк-цуькведив рахаз жеда,

Ширин ванцел мани лугьуз,

Гуьзел хуш я куьн, Къутунхъар.

 

Ажеб гуьрчег тIебиатдин,

Намуслу халкь берекатдин,

Мални девлет квехъ, гьелбетда,

Гьар кеспидин хуьр, Къутунхъар.

 

КIвалер къени, мугьман хуьдай,

Ачух суфра, фу теклифдай,

Михьи рикIин жемят авай

Масан ватан я Къутунхъар.

 

Бубайрин гаф веси хьуй чаз,

Катмир хуьряй куьн, жегьилар!

Шиир кхьиз, хуьр рикIеваз,

Вун зи макан я Къутунхъар!

 

Зи уьмуьр

 

Физва йикъар, варцар, йисар,

АтIуз календардин чарар,

ХьанвачтIани рехи чIарар,

Кьуьзуь хьанва, кумач ухшар.

 

Акван тийиз, вилер буьркьуь,

АлукIнава еке очки.

Амма жуван рикI я жегьил,

Дустар, куьн зал жемир пехил.

 

Аллагьди гай бахтлу яшар,

Алатнава жегьил вахтар.

Гьайиф ятIан жез икI кьуьзуь,

Уьмуьрдилай я зун рази.

«Лезги газетдин» 2026-йисан 3нумрадай