Къадим къеле

Агъа Къекъре, Вини Къекъре —

Юкьвал дестек — къадим къеле!

Хайи ватан, чан зи диге,

Гьамиша вун ава рикIе!

 

Аскеррин я къеле шагьид,

Чапхунчийриз жаваб гайи.

Азадвал, чаз ада хвейи,

Чахъ галама даим цIийиз.

 

ЦIар илитIна, кьуьзуь, жегьил

Къелед  цлав, шад  яз гуьгьуьл.

Ширин  суьгьбет,  къизгъин негъил,

Ала анал камалдин гьуьл.

 

Хуьрел элкъвез хинкIалдин ни,

Къах кутунвай, рикIиз кIани.

Ашукьбурун гур я мани,

ЦикIен, тIанур, хизан къени.

 

Шимихуьруьн къадим къеле,

Агъуз тахьуй ви кьил-келле.

Жемятар ви хьурай меле,

Гад агудиз мублагь чиле.

 

Гьейран ая атай мугьман,

Эй агъсакъал, гьуьндуьр кьакьан!

Кьисмет тахьуй ваз нагьакьан,

Яшамиш хьухь жезамай кьван!..

 

И чIал кхьей цIийи устад

Шимихуьруьн руш я Саяд.

Ватан хьурай мадни абад,

Давам хьурай рикIин баяд…

 

Дидедиз

 

Вун куьч жезвайди им гьи бере я?

Хушзамачни ваз и чи дереяр?

Диде, чан диде, вун чи чIере я,

Зунни ви бала, рикIин зерре я.

Фимир, чан диде, вун а яргъариз.

Гумир на хифет хайи дагълариз.

Балайрин кьилел хьухь вун ялвариз,

Ви ван жерид я михьи цавариз…

Япара ама ви лайлайдин сес.

ДатIана ада гузва чаз гьевес.

Кьисмет тахьурай са касдизни терс, —

Гьинай жагъида дидедин эвез?..

 

Билбил

 

Таран хилел алай билбил,

Вучиз вуна агъузна кьил?

Куь авуна ви рикI сефил?

Ни къакъудна ви шад кфил?

Чубан гада ая на шад,

Акъвазармир назлу баяд.

Ви вах я зун — дагъви Саяд,

Билбилдин сес хуравай сад…

«Лезги газетдин» 2019-йисан 40-нумрадай