Сад я вун!

Экуьнахъ экъечIай

Ракъинин нурари

Безетмишда

Сифте дагълар чи кьакьан.

Халкьдин шаир Сулеймана

Машгьурна дуьньядиз

Чи Дагъустан.

 

Яшамиш жез ватанда, хайи чилел,

Халкьдин арадаваз,

экъечIиз кимел,

Машгьур хьана вун дуьньяд винел,

ТIвар — райондал, дагъларал, гимийрал, гьуьлел…

 

ГъвечIи чIавалай “дадмишна” зегьмет,

Фяледиз гана вуна еке къимет.

Ханар, беглер авуна лянет,

Ви ктабар хьанва халкьариз девлет.

 

Цава нур гузвай гъетерикай

Хкахь тийир гъед я вун!

Дагъустандин шаиррикай

Гомер я вун, сад я вун!

Ихьтин шаир халкьдихъ хьунал

Пехилбурни туш тIимил.

Ви юбилей къейд ийизва, —

Вине жеда мад чи кьил!..

ЦIийи Макьар

«Лезги газетдин» 2019-йисан 18-нумрадай

_________________________________________________

Жегьил сувар

Кутазвай чак руьгьдин лувар,

Мубаракрай чIехи сувар!

Рейсад я чахъ стха халкьар,

Къуьн-къуьневаз санал алай.

Чаз и сувар тешкил авур,

Шарвилид тур хкаж хъувур,

Асландин руьгь авай инсан

Чи Имам хва я чаз масан!

Туьнт кьуьлериз, мани лугьуз,

Къад йис сувар кьиле тухуз.

Самур дере, ацалтна ван,

Югъ-къандавай жезва кIубан.

Кьуд пата халкь — ачух рикIер,

Дуьзмишна майданар иер,

Хъуьруьн, мани къугъваз сивел,

Ша, хкаж жен КIелез хивел.

«Лезги газетдин» 2019-йисан 31-нумрадай