Луиза Агьмедова 1993-йисуз Сулейман-Стальский райондин Герейханован хуьре дидедиз хьана. 2010-йисуз Раидин Османован тIварунихъ галай школа, 2016-йисуз хъсан къиметралди ДГУ-дин филологиядин факультет акьалтIарна.
4-классдилай башламишна кхьизвай адан эсерар “Сулейман”, “Булахдин чешмедал” ктабра гьатнава. Жегьил шаирди Бакуда акъатзавай “Алам” журналдихъ ва маса изданийрихъ галаз алакъа хуьзва.
Чи манидарри адан чIалариз кхьенвай хейлин манияр тамамарзава, халкьди абур хушвилелди кьабулзава.
Алай вахтунда Луизади вичин ширрин ктаб чапдиз гьазурзава.
Марф
Низ гьарайин, къеневай рикI кузва зи!
Марф, вун ават и буш хьанвай чилерал.
Экв вилерин дердери атIузва зи,
Шумуд накъвад гел ала зи гъилерал…
* * *
Низ лугьун за, низ ахъайин сирер зи,
Вун зи патав декьикьайра хьайила?..
Ваз савкьат хьиз багъишдай за кифер зи,
Захъ вуч ама, зи рикIни ваз гайила?..
* * *
Зи гьар нефес, гьар са фикир кьилевай
Къурбанд хьуй ваз,икьван рикIиз кIани яр.
Ахъа тахьуй гьич зи гъил ви гъилевай,
Вун патав гваз, сивел къвезва манияр.
* * *
Бакудавай Къара-къеле шагьид яз,
Ви гъил кьуна, “КIан я заз вун” лагьанай.
И дуьньядал виридалай кIанид яз,
Марф къвадай къуз зун ви патав атанай.
* * *
РикIелламан, чи гъил гъиле жедайла,
На тарцелай заз инияр гъайиди?..
Гьар сеферда цавар — чилер шедайла,
РикIел гъваш зун ваз хьайиди, кIаниди…
* * *
Гьикьван вахтар хьайитIани къуьнерихъ,
РикIелай фич вун галачиз кайивал.
Гьамишалугъ дарих жеда гъилерихъ
Къеледи хьиз, на зун рекье хвейивал.
* * *
Заз ахварай аквазва вун,кIаниди,
А ахварар зи фикиррин са кьатI я.
Заз килигиз рахазва вун, кIаниди,
Вун икI кIан хьун зи чIехи тир гъалатI я.
* * *
Ви гьар нефес,гьар са ви гаф къизил я,
Амма вун зи гъиле тежер савкьат я,
Ви юлдашдал зун дердинай пехил я,
Вун хьтин яз-им гьар рушан мурад я.
* * *
Ви муьгьуьббат-им зи чIехи лувар я,
Заз чизва вун и дердери кузвайди.
Вун зи ширин,амма куьруь ахвар я,
Заз чизва на заз чимивал гузвайди.
* * *
Вун чарадан кьуьлуьн макьам хьана хьи,
Зун къвалалай ваз килигиз амукьда?
Вун кIан хьайи зи чан-беден кана хьи,
Чун къакъатда,амма рик! ваз амукьда.
Луиза Агьмедова
