Залум рекьер
ЦIемуьжуьд йис — гзаф вахт я гуьзетиз,
“Диде, сагърай!” — физва къе зун Ватан хуьз.
Пак тир буржи кьиле тухуз гьазур я,
— Зун хьтинбур къе са шумуд агъзур я.
Самаркандда, — йифен цIикьвед, — секин тир,
“Рота, подъем!” — галукьна ван япарихъ.
Къарагъна чун — фикирарни дерин тир,
Машинрини гуьзетзавай ракIарихъ.
Физва поезд, йиф-югъ талгьуз тахъ-тахъиз…
Чу, аскерар, мукьва хьана Термездиз.
Вил рекьелла, мус агакьда афгъандиз?
— Стха халкьдиз куьмек патал Ватан хуьз!
Вертолётри чун, аскерар, афгъандиз, —
Мергьяматдиз давамна рехъ — къастуниз.
Вилаят тир Бадахшандин ценерив,
Кочка вацIун кьилел алай частуниз.
— Ингье чи кIвал, — стха-къазма, юлдашар.
— Куь гьунарар гуьзетзава Ватанда,
— Тергна кIанда сад амай кьван душманар,
— Баркаллувал къазанмиша афгъанда!
Югъ-йиф талгьуз, яракь кьуна гъилерал,
Кьисмет хвена стха афгъан халкьарин.
Чанар гана Афгъанистанд чилерал,
Намусдивди жуван хайи дагъларин!
… МичIи йифиз гатадай чун марфади,
Кьурай чка кумукьдачир бедендик.
Гуьллейрин цIун а селлери душманрин,
Секинвал гьич агуддачир чи чандив.
Къаракъумар къишлахда, лап алахьиз,
ЦипицI, шефтел, бухари хват мублагь тир.
Рагарикай шир-ширдив яд авахьиз.
Басмач Ханбай, вав ина гвайд дамах тир!
Юкъуз — дагъдиз, йифиз — багъдиз хкведай,
Кесиб халкьдин къене авай тIуьна рикI.
Фенд къурмишна, — яракь гуда лагьана,
Ханбай — хандин чан ахчунай эхир икI!
…Меслятрилай гуьгъуьниз чи уьлквейрин,
Атанай чун квез куьмек яз Афгъандиз.
Ина физвай эцигунар муькъверин,
Рехъ хъувуна Кундуз — Файзабаддиз.
Варцаралди хьанай сад хьиз рекьерал,
Къаравулда гатуз-хъуьтIуьз женгерин.
Фу амачиз, гишин хьайла кьерерал,
Мажбур жедай балугъар кьаз вацIарин.
Афгъанви дуст, вуна гайи фу — лаваш,
Вуч дадлу тир, мадни хьурай берекат!
Куь къаршидиз, мергьяматдиз чун яваш
Гьич тахьана, давамарна гьерекат.
Тешкан вацIал алай муькъуьн а сергьят,
Хуьдайла гьич хьайиди туш чаз регьят.
Хъиткьинариз, на лугьуди, гьар са сят
Йис хьана чаз, душмандин хур аквадай!
Муькъуьн кьилел эцигнавай а гуьмбет,
Гьамишалугъ пак тарихдин дестек я!
Дагъустандин женгчи аскер, ви суьрет,
Инанмиш хьухь, ислягь я гьа Афгъанда!
Гуьллед хурай экъечIна, цIай-вацIайни,
Тамамарна гьукуматдин пак буржи.
“Де куьн сагърай”, — лагьана дуст афгъандиз,
Хтанай чун жуван багъри Ватандиз!
Ислеман Ризаев
