Бахт я, бахт

Цифер-чIемер сад-садавай  къакъатна,

Рагъ атана, сувар хьиз,  зи уьмуьрдиз.

Лув гуз, лифер яваш-яваш агатна,

Муьгьуьббатди хабар гана  рикIиз зи.

Чи бахт я, бахт, рикIерни къе  сад авур,

Зун вун авай дуьньяда лап  шад авур.

 

Дегиш хьана заз и дуьнья элкъвена­,

Лап кьуьд амаз гатфар хьана уьмуьрда.

Ашкъид рикIер сад-садав  чи гелкъвена,

На лугьуди, гьатнава зун суьгьуьрда­.

Чи бахт я, бахт, рикIерни къе  сад авур,

Зун вун авай дуьньяда лап  шад авур.

 

Гьар жуьредин цуьквер ава  багълара,

РикIни, лугьун, гьа са цуьк хьиз  хъуьрезва.

Акваз-такваз жив цIразва  дагълара,­

Муьгьуьббат чав вилералди  рахазва­:

— Чи бахт я, бахт, рикIерни къе  сад авур,

Зун вун авай дуьньяда лап  шад авур.

 

Уьмуьр фирай, зи гъил, яр,  ви гъилеваз,

Чан-чан лугьуз, сад-садан рикI  рикIеваз,

Зун ви свас, вунни чам я къе  жегьил,

Гьич садрани чIурдач, яр, за ви  гевил.

 

Зи рехъ вахъди  элкъвена

Фикирначир уьмуьрдин рехъ  элкъведайди,

КIани рикIер сад-садав   чи къекъведайди,

Муьгьуьббатдин гьиссер икI  чахъ гелкъведайди,

Рекьерини яргъарай чун агуддайди.

 

Вун рикIеваз йикъар-йифер, яр,  физва зи.

Такур юкъуз рикI хуравай   ифизва зи.

Вилерин нур ви гьунар я,  ви къахма я,

Чи кIанивал, цаву гайи, лап зурба я.

 

Таниш хьайи гатфар авай  лап бегьерда.

Зи вилерай аквазва вун  са гевгьер яз.

Хъуьрезва рикI вун гьар акур заз сеферда,

Хуш хьайиди вун я, вун заз и  тегьерда.

 

Гекъиг жеч гьич дуьньядаллай  вун девлетрив,

Сад Аллагьди агуд тавуй  вун нифретрив…

«Лезги газетдин» 2019-йисан 50-нумрадай