Гьажи Шерифали Шерифалиев чи газетдихъ галаз яргъал йисара сих алакъа хвейи зегьметчи инсан тир. Гьа са вахтунда ам хайи хуьре, районда, уьмуьрдин эхирдай Махачкъалада эл-жемятдин къени гзаф крарик рикIин захавилелди акахьай кас я. Уьмуьрдин эхирдай ам гьаждални фена. Вичин патай ядигар яз, “Мавлид” тIвар алай ктабни кхьена, чапдай акъудна.
Чи арада вич амачиз гила цIуд йисалайни гзаф я, амма ада кхьей бязи эсерар чи гъилера, кIвалера ама.
Агъадихъ гузвай эсерар, Гьажи Шерифалидин 90 йисахъ, гьакI ЧIехи Гъалибвилин суварихъ галазни алакъалу яз, чав адан стха Шерифалиев Давута агакьарна. Зегьметдин ветеран Мегьарамдхуьруьн райондин ЦIийи хуьре (Мацар куьч хьанвай чка) яшамиш жезва.
Ханбике вахаз
Ви ктабар кIелай гьар са инсандиз
Тарихдикай хабар жеда хъсандиз.
Инсаф тийиз пехъи къанлу душмандиз,
Гзаф я ви игитвилин сан, бике,
Играми вах, азиз диде Ханбике!
РикI гъамлу яз, атIуз тунай кифер на,
Ахвар тийиз, эхнай йикъар-йифер на,
Карелиядиз кьван тухвана сефер на,
Азад хъувун патал чи Ватан, бике,
Играми вах, азиз диде Ханбике!
Асланрихъ гьич жедач диши-эркекди,
Рушар жеда тек-тек вун хьиз зирекди,
Алакъа тир чи фронтдиз герекди,
Ам хвена на, эцигна ви чан, бике,
Играми вах, азиз диде Ханбике!
Ви гьар са кар чи жегьилриз чешне я,
Намус михьи, мез ширин, кьил вине я.
Шагь дагъ, эсил ватан Къаракуьре я,
Жуьрэтлу тир картарин макан, бике,
Играми вах, азиз диде Ханбике.
Вил вегьена фейи четин рекьериз,
Дурум гайи кашаризни мекьериз,
Ухшар я куьн Шалбуз дагъдин лекьериз,
Сирнавзавай цавара кьакьан, бике,
Играми вах, азиз диде Ханбике!
КIел жеч ктаб, нагъв татана вилерал,
Са куьнивни гекъиг жеч куьн чилерал,
Дамах къачуз ви орденрал, чинерал,
Кхьиз жеда вакай са дастан, бике,
Играми вах, азиз диде Ханбике!
Кьегьалвилер ахъайдайла, ахвар хьиз,
Чи жегьилриз акI жеда хьи, махар хьиз,
Гьунар жеч итимрихъни ви гьунар хьиз,
Фронтда вун хьанай пагьливан, бике,
Играми вах, азиз диде Ханбике!
Аси инсан
Аллагьди вун халкьна зайиф,
И кар ваз чидачтIа, гьайиф,
Куьчейра акъудмир югъ-йиф,
Ви язух я, аси инсан.
Вун вуж ятIа чидач хьи ваз,
Ваз вун акваз гужлуз, зурбаз,
Амукьда вун пIузар жакьваз,
Ви язух я, аси инсан.
Яратмишай жумла — алем,
Аллагьди ракъурай калам,
Кваз такьуртIа якъин на ам,
Ви язух я, аси инсан.
Инсанвилин шартIар ава,
Асивилихъ кьадар ава,
Вахъ шейтIанар — дустар ава,
Ви язух я, аси инсан.
Аллагьди вун халкьна, инсан,
Чир хьухь лугьуз писни хъсан,
РикIел текъвез иман-игьсан,
Ви язух я, аси инсан.
Шерифалидин и гафар,
Вун паталди чIулавна чар,
Ша захъ галаз вун хьухь икьрар,
Ви язух я, аси инсан.
Аллагьдин тIвар мецеллаз
Ажал мукьвал жезвайди за кьатIузва,
Югъ-къандавай рикI гъамуни атIузва,
Туькьуьл накъвар къвез, вилерни ацIузва,
Имандивай чун къакъудмир, я Аллагь.
Яргъи гатун югъни эхир акъатда,
Ажал ферз я, ам виридав агатда,
Гъамни, хвешни, гагь сад къвез, сад алатда,
Гъамунин парце чун твамир, я Аллагь.
Дуьньядикай фикириз, рикI цIразва,
Гьахъсузвилер гьар юкъуз чаз аквазва,
Къияматдин йикъан къайгъу чIугвазва,
Яргъалди месе чун твамир на, я Аллагь.
Зайиф хьана, хъуьтуьл месел алкIизва,
Рахаз техжез, дилавар мез галкIизва,
Эхир мензил ажал тирди заз чизва,
Жегьеннемда на чун кумир, я Аллагь.
Инсандивай вичин абур хуьз жезвач,
Шариатдин рекьяй вилик физ жезвач,
Гьалал берекат суфрадал гъиз жезвач,
Гьарамбурук чун кутамир, я Аллагь.
Инсанвилин багьа тIвар гьакI винеллаз,
Рекьидайла Шагьадатни мецеллаз,
Эхиратдиз мусурманрин къуьнеллаз,
Фидай сурун лакьан дармир, я Аллагь.
Шерифалид гьалал, гьарам кьатIана,
Бубадин гаф хуьз хьана за датIана,
Гьахъсузвили зи рикIин гъал атIана,
Дуьньядилай гьахъ квадармир, я Аллагь!
Гьажи Шерифали, «ЛГ-дин» 2018-йисан 19-нумра
