* * *

Ви бармакдин гьар са чIарчIиз нур къурай,

Зи лезги халкь дуьньядиз чир авурди.

Ваз Аллагьди гуьзел женнетд юкь гурай,

Акьуллу кьил садран агъуз тавурди.

Ви гьар са гаф — хци алмас, муьхъ тежер,

Аямар физ, гьулдан хьана, руьхъ тежер.

Цана къелем къумлух чуьлда, цуьк тежер,

Багъ битмишна, емиш дадмиш авурди.

Ви рикIикай яд хъурай чи жегьилри,

Ви гьар са гаф тикрар жервал алемда.

Кьакьан аршда лув гурай ви векилри,

Арифдаррин арифдар хьайи Сулейман!

 

Гьайиф я заз

Дуст  КьепIир  Самгатаз

Хаин хабар агакьна зав

Вуч фад чавай къакъатна вун.

Лагь, вуч тади акатна вак,

Иблисдив гьикI агатна вун.

 

Гьар суфрадиз тир вун лайих, —

РикIе даим — михьи къилих.

Гила кьилихъ — лацу сирих, —

ИкI къакъатун гьайиф я заз.

 

РикIевай ви мурадар дуьз,

Алахъдай вун, стха, дуст хуьз.

Фад туширни женнетдиз физ,

ИкI къакъатун гьайиф я заз.

 

Ви хтулриз гурай бахтар,

Вишни къад йис — яшди вахтар.

Гьахьтинд хьана Худад кьадар,

ИкI къакъатун гьайиф я заз…

«Лезги газетдин» 2019-йисан 8-нумрадай