Докъузпара райондин Филерин хуьре дидедиз хьайи ада юкьван школа куьтягьайдалай кьулухъ райцентрада, Усугъчайдал, библиотекада кIвалахна, Дагъустандин дишегьлийрин пединститутда кIелна. Гуьгъуьнлай А. Султановадин уьмуьр Дербент райондин Деличубан хуьре фена. Ина ада яргъал йисара юкьван школада урус чIаланни литературадин тарсар гана. Алакьунар авай педагог ва чIехи хизандин кьил яз, виридан патай гьуьрмет къазанмишна.
Школада амаз шиирар кхьиз эгечIай А. Султановадин эсерар газетризни журналриз акъатна, абуру кIелзавайбурун фикирар желбна. Абурукай са кьадарбур 1970-йисуз акъатай уртах «Чешме» кIватIалда гьатна. Шаирдин эсерриз къешенг рангар, дерин фикирарни ялавлу гьиссер хас я. «Зун лезги я» шиирда ада кхьизва:
Зун лезги я, Лезгистан зи лувар я.
Зун лезги я, халкьдин садвал сувар я.
Зун лезги я, ашукь я зун, зари я.
Зун лезги я, женгчи хьунал рази я.
Хайи чил кIан хьунин, инсанпересвилин гьиссер адан рикIе садрани зайиф хьанач, адаз вичикай икI лугьудай ихтияр авай:
Цавун аршдиз лув гуз кIанда рикIиз зи,
Килигдайвал лезги чилин накьвариз.
Йикъа садра тавуртIа са хъсанвал,
А йифиз зун фидач ерли ахвариз.
Шаирдин яратмишунар 2000-йисуз акъатай «РикIе хуьзва за» кIватIалда гьатнава.
«Лезги газетдин» 2024-йисан 33-нумрадай
