Кьенвач устад!
Лезги халкьдин дамах, Россиядин лайихлу артист
Абдуллагь Гьабибован экуь къаматдиз
Гатана гару цуькведин яйлах,
Квахьна чавай чи артист Абдуллагь.
АкI хьанва къе чаз, квахьайди хьиз дагъ,
ЭкъечI хъийизмач экуьнахъ мад рагъ.
Чи халкьдин чIехи дамах тир хьи вун,
Ви бажарагъдал гьейран тир лап чун,
Четин хьанва чаз нефес гьикI къачун,
ЧIал кьуранва зи, гила вуч лугьун.
Ахквадач мад вун сегьнедал милли,
ГьикI авурай эх и кар чи рикIи?
Акъатдач вун чи рикIерай ерли,
Вал ашукь хьанвай Лезгистан вири.
Устадрилай на къачузвай чешне,
Театрдин тIвар авунай вине,
Тамам мектебдин кутуна бине,
Ви тIвар амукьда несилрин рикIе.
Агалкьунар вахъ хьана лап чIехи,
Вун фейи рекьер даим тир экуь.
Абдуллагь стха, гъизва ваз рагьмет,
Ви ирс чун патал я чIехи девлет.
«Лезги газетдин» 2024-йисан 3-нумрадай
