Хци зигьин авай гадади хуьруьн медресада кIелна, илимрин дибар, чIалар чирна. Шаир Малла Нуридин хьиз адан тIвар-ван акъатна.
1877-йисан бунтара иштиракунай Малла Нури сифте Дербентда дустагъна, ахпа Урусатдиз суьргуьнна.
Са кьадар йисара Нуриди Ростовдай Бакудиз тухузвай ракьун рекьел, Бакуда нафтIадин мяденра кIвалахна. И йисара ада фялейрин четин уьмуьрдикай, обществода авай гьахъсузвилерикай шиирар кхьена. Адазни, Ахцегь Гьажидиз хьиз, фяле-шаир лугьуз жеда. 1913-йисуз Петербургда акъатиз хьайи «Заря Дагестана» газетда адан «Гъурбат» шиир чапнава. Шиирда ихьтин цIарар ава:
Гъурбатда кьейибур вири,
Садани кьач ламран ери,
Мейитдихъ галаз къвери
Гуьгъуьна са гар жеда хьи.
Баша-баш кафан жеч кьадар,
Сур эгъвейла, жез даяз-дар,
КIвач кьуна, ийиз акадар,
Ви сур гзаф дар жеда хьи.
Факъир Нури, жемир ваз кIан
Гъурбатдикай хьайи ватан,
Кьуд йисуз пуч хьана ви чан,
Къан тахьай Сибирь хьана.
Малла Нуридикай сифте яз малумат Р. Амирханова «Заря Дагестана» газетда «Смерть поэта» макъалада гана. Адан шиирар Гь. Гашарова печатдиз акъудна, ахтармишна.
«Лезги газетдин» 2025-йисан 25-нумрадай
