Вун эбеди вине я!
Вич яшамиш хьайи гьар са камуна
Чи Эминаз четинвилер акуна.
Руьгьдин дестек, камаллу кас, хва лезги,
Варлуйризни, фитнечийриз зур гайи!
— Къелем гъиле яхъ, — лугьуз на гьарайна,
Кесиб халкьдихъ элкъвена вун къарагъна.
Арифдар, ви яракь хьана кхьинар,
Негь авуна алчахарни хаинар!
Шииратда альпинист яз хайиди,
Элбрусдин дагъдин кукIвал фейиди!
Фикир гана кIелайла ви шиирар,
Аквазва чаз зулуматдин девирар.
Вун тек хьана, гьахъвал патал эверай
Ви далудихъ кас хьаначир эвелдай.
Ви гъавурда акьаз таниш жердавай
Хци жезва ви фикирар къвердавай!
Ви шиирар элкъвенва къе манийриз,
Себеб жезва чи тIалризни дердийриз.
Чирвилерин деринвал ви еке я,
Чун ваз буржлу, вун эбеди вине я!
Гьамишалугъ амукьда вун вилик кваз,
Даим жеда шаирар ви гъилик кваз!
Эмин, Магьмуд, Ирчи-Казак, Батырай,
ГьакIни Саяд- шаирар я чахъ авай.
Дагъустандин гьунарар я абур чи,
Шииратда бубаяр я абур чи.
Эмин ава кIвенкIве вири шаиррин,
Ам устад я жавагьиррин, шииррин!
«Лезги газетдин» 2018-йисан 28-нумрадай
_________________________________
ЧIехи шаирдиз
ЦIекьрекьарна цIайлапанри,
Къукърумарна, цав рахана,
Акатна марф, стIал-стIал,
СтIалри чил гатана.
СтIалрикай ятар хьана,
Хвалар церив ацIана.
Хваларикай кIамар хьана,
КIамар церив ацIана.
КIамарикай вацIар хьана,
ВацIара яд самбар хьана,
Гьуьлерихъди чукурна —
Гьуьлера яд артух хьана.
Лепейрини басрух гана,
Рекьер гьарнихъ ачух хьана,
Океанрик акахьна.
Хуьре къвайи марфад стIал,
Лап яргъариз — океанриз акъатна.
Агъа СтIал! Вини СтIал! Кьулан СтIал! СтIалар!
Сулейманни — стIалви чи!
Ухшар хьана адан бейтер, жавагьирар
а марфадин стIалриз.
ЭкъечIна ам СтIалдилай,
Камар къачуз, мягькемдиз,
Машгьурна вич хуьре — кIвале
Ва гьакI вири уьлквейриз:
Сулейманан тIварар ава
Шегьеррани хуьрера,
Сулейманан чIалар ава
Ам истеклу рикIера…
Океанрал сирнавзава
Сулейманан гимиди.
Сулейман я чи аямдиз
Виридалай кIаниди.
Чи девирдин Гомер я ам
Акьул, камал хци тир.
Сулейман я Дагъустандай,
Дагъустандин халкьдин шаир.
Лезгистандай…
Лезги шаир…
Виридалай чIехи тир!
«Лезги газетдин» 2018-йисан 11-нумрадай
