Лезги эдебиятдал кьару инсанриз шаир Бренбег Абдуллаеван тlвар фадлай таниш я. Адан шиирар Докъузпара райондин “Эренлардин сес”, “Лезги газет” газетриз, “Самур” журналдиз мукьвал-мукьвал акъатзава. Адан гзаф шиирар манийриз элкъвенва.
Абдуллаев Бренбег Шевкетович 1961-йисан 14-февралдиз Докъузпара райондин Мискискарин хуьре дидедиз хьана. Ада хуьруьн юкьван мектеб ва Дагъустандин медениятдин колледж куьтягьна. Советрин Армиядин жергейра къуллугъна хтайдалай кьулухъ, 1985-йисалай хуьруьн Медениятдин кlвалин директорвиле кlвалахзава. Райондин сергьятра кьиле физвай хейлин мярекатра устадвилелди иштиракзава. Ам къени инсан хьиз, жегьилар патал хъсан насигьатчини я.
Б.Абдуллаева Ватандикай, тlебиатдикай, муьгьуьббатдикай шиирар кхьизва. Икьван чlавалди адан “Зи рикlин рехъ” тlвар алай сад лагьай ктаб. Гила Махачкъалада вад виш экземплярдин кьадарда аваз “Дагъларин накъвар” тlвар алай кьвед лагьай ктаб чапдай акъатнава.
Ктабдин редактор Зульфикъар Къафланова икl кхьизва: “Къецеллайди йиф яз хьайитlа, адан (Б.Абдуллаеван — К.Ф.) шиирри квез экв гуда, кьуьд яз хьайитlа — чим”.
Гьакъикъатдани, адан шиирар метлеб авайбур, кlелчидив верервирдер ийиз тадайбур ва чпикай нагьисат хкудиз жедайбур я. И гафарихъ инанмиш хьун паталди шаирдин “Багьа затlар” шиирдин са бендиниз фикир гун:
“Вилиз таквар сувабрилай,
Гьуьрмет авун вафа я, дуст.
Эхиратдин азабрилай,
Авам хьунухь жафа я, дуст”.
“Къелемдин дустариз» шиирда икl кхьизва:
“Лагь, кхьизвай шиирдин цlар,
Вучиз икьван яван хьурай,
Фагьум-фикир хьайила дар,
Буш гафарихъ вуч ван хьурай!?”
Шаирдин эсерра зал адетдин кlелчидиз таниш тушир гафарни гьалтна: кьуьзуь-муьзуь, аруда, эбре, чинебалух, инсанлух, къиретсуз, пайсар, захават…
Б.Абдуллаеван цlийи ктабдиз къуй кlелчийри чпи къиметни гурай, адакай лезетни хкудрай.
Куругъли Ферзалиев
