Анапада кикбоксингдай дуьньядин международный кубок патал кьиле фейи чемпионатда дагъустанвийрин команда тафаватлу хьана. Акъажунра 28 уьлкведай 1200 спортсменди иштиракна. Дагъустандин командадик кваз аниз фейи 54 спортсмендикай 20 — къизилдин, 11 — гимишдин ва 9 буьруьнждин медалар гваз хтана.
Вичин ери-бине Кьурагь райондин Хуьрехуьряй тир Гьажимурадов Абдурагьима и акъажунра “лайт-контакт” ва “кик-лайт” кьве разделдай дуьньядин чемпионвилин тIвар къазанмишна. Адахъ галаз Къиргъизистандай, Эрменистандай, Къазахстандай ва масанрай тир спортсменри къуватар алцумна.
2007-йисуз дидедиз хьанвай Абдурагьима Махачкъала шегьердин 3-нумрадин школада кIелзава ва гьа са вахтунда 1-нумрадин школадин патав гвай ДЦБИ-да Вагьаб ва Абдула Амаеврин гъилик кикбоксингдин сирер чирзава. Ирид йис хьайидалай кьулухъ вичиз еке ашкъи аваз спортдин и жуьредал машгъул тир Абдурагьим пуд сеферда Дагъустандин чемпион, са шумудра Махачкъаладин чемпион, алатай йисуз, 9-Майдин суварихъ галаз алакъалу яз, Ленинкентда кьиле фейи акъажунрин, 2017-йисан гатфарихъ Ростовский областда тухвай Шолохован тIварунихъ галай турнирдин, гатуз Брянский областда “Лацу жанавуррин”, Избербашдин чемпионатдин, сентябрдин сифте кьилера тухвай Каспийск шегьердин чемпионатдин кIвенкIвечи я. Жегьил пагьливандин шабагьрин арада 15 кубок, 20-дав агакьна грамотаяр ава. Боксдани ада вичин къуватар ахтармишзава, агалкьунарни ава.
Алай вахтунда гъвечIи пагьливан Дондин Кубок патал ва Самарадани Санкт-Петербургда кьиле фидай акъажунриз гьазур жезва. Абдурагьимахъ къведай йисуз Бразилияда дуьньядин чемпионатда иштиракдай мурад ава.
Кикбоксингдай мад са кьурагьвиди агалкьунар къазанмишунин гьакъиндай чав Ставропольский крайдай хабар агакьна.
Агьмед Агьмедова Македониядин меркез Скопье шегьерда кикбоксингдай Европадин кIвенкIвечивал патал кьиле фейи акъажунра 1-чка кьуна.
Акъажунар кикбоксингдин ругуд разделдай тухвана. Ина 37 уьлкведай атанвай 1500 спортсменди иштиракна. Россиядин хкянавай командадик Ставропольский крайдин векиларни, гьа жергедай яз чи ватанэгьли, Изобильненский райондин Московское хуьре яшамиш жезвай Агьмедов Агьмедни квай.
Ада 81 кг-дилай артух заланвал авайбурун арада гъалибвал къазанмишна.
Дагъви Шериф
