Владикавказдин “Спартак” аренадал Кавказдин халкьарин культурадин ва спортдин VIII фестиваль кьиле фена. Ам ачухунин шад мярекатда Кеферпатан Кавказдин крарай РФ-дин министр Лев Кузнецова, СКФО-да РФ-дин Президентдин патай тамам ихтиярар ганвай Векилдин заместитель Валерий Попкова, Кеферпатан Кавказдин регионрин регьберри иштиракна. Дагъустан Республикадин патай ана РД-дин Гьукуматдин Председателдин Сад лагьай заместитель Анатолий Къарибова векилвална.
Кеферпатан Осетия Республикадин Кьил Вячеслав Битарова нубатдин фестиваль чпин республикада кьиле тухун еке жавабдарвал ва ихтибарвал тирди къейдна.
ЦIи фестиваль ачухуниз талукь тебрикар космосдай, космический станциядин экипаждин членрилай — Александр Мисуркиналай ва Сергей Рязанскийдилай атана.
Концертдин программада 500-дав агакьна артистри иштиракна.
Лев Кузнецова лагьайвал, космосдай и мярекатриз фикир гуни фестиваль гьакъикъатдани вири алемдинди авуна.
Валерий Попкова СКФО-да РФ-дин Президентдин патай тамам ихтиярар ганвай Векилдин тебрикдин чар кIелна.
Спортдин акъажунар 12 жуьредай кьиле фена — кьезил атлетикадай “эстафета”, армспортдай, цIил ялунай, юкьвар кутIуннаваз кьуршахар кьунай, цIилинай хкаж хьунай, кIирераллаз къекъуьнай, мензилдиз пар чIугунай, къуватдин троеборьедай, путар хкажунай, яргъаз хкадарунай, хьелерай ягъунай, мини-футболдай. Чпин къуватар Кеферпатан Кавказдин вири республикайрин векилри, санлай 350-далай виниз спортсменри алцумна.
Дагъустандин хкягъай командади фестивалда 2-чка кьуна, 1-чкадиз Кеферпатан Осетиядин спортсменар лайихлу хьана.
Дагъви Шериф
