—            ТупIуз цаз акьахна, ам акъудиз четин тирла, тIуб са шумуд декьикьада чими авунвай набататдин гъерида туртIа, цаз регьятдиз акъатда.

—            Кьил тIазвайла, са стаканда авай къайи цик хуьрекдин кьве тIуруна авай шекер хуькуьрда, ахпа а къаришмадай салфетка кьежирна, пелел эцигда. ТIал фад секин жеда.

—            РикI тIазвайла, верхи тарцин (береза) таза пешерин къаришма гзаф хийирлу я. Ам икI гьазурда: хуьрекдин кьве тIуруна авай пешерал са стакан ргазвай яд илична, зур сятда­ тада. Ахпа ам, куьзна, чукIулдин кIвен­кIвел алай хуьрекдин сода алава хъувуна, йикъа 3-4 сеферда гьар 3-4 сятдилай къаришма куьтягь жедалди хъвада.

—            Бронхийрин астма авайла, хуьрекдин 2 тIуруна авай ракъин цуькведин таза пешерал са стакан ргазвай яд илична, 10 декьикьада зайиф цIал эцигда. Ахпа ам, куьзна, сифте кьадарда авайди жедайвал ругунвай яд хъияна, йикъа 3-4 сеферда фу нез 20 декьикьа амайла хуьрекдин 2-3 тIуруна авайди ишлемишда.

1-2 стаканда авай яд хъвайидалай гуьгъуьниз мецел пуд тупIу кьур кьел вегьейтIа, кьадардилай  йигин хьанвай пульс секин жеда, давление агъуз ахватда, нефес кьун акъвазда.

—            РикIи фад-фад кIвалахзавайла, аптекдай маса гузвай инийрин (боярышник), пустырникдин, пиондин, валерианадин настойкаяр (гьар сад 100 мл) ва эквалиптдин — 50 мг, пурнийрин — 25 мг вири са банкадиз ичIир­на, аниз 10 твар михекар (гвоздика) алава  хъувуна, банкадал кьил гьалдна, кьве гьафтеда мичIи чкада эцигда ва ара-ара банка юзурда. Ахпа, йикъа 3-4 сеферда 25 г циз 25 стIал и къаришма  вегьена, хъвада. Ада нервияр ва кьиле, япара авай сес секинарда, гьа жергедай яз мефтIедин ивидин давление, рикIин кIвалах къайдадик кутада.

—            Шекердин азар авайбуру, гьар экуьнахъ ичIи рикIелай са вацран вахтунда чранвай чичIек ишлемишайтIа, беденда шекердин кьадар  къайдадик жеда.

—            Бурандин цилер гзаф азаррин дарман я. Абуру ратарин кIвалах къайдадик кутазва, гьакIни а цилер предстательный  железадин азардин вилик пад кьун патални ишлемишзава.

250 г цилер як регъведай машиндай авадарна, са тIимил виртни хуькуьрна, гьар экуьнахъ чайдин са тIуру­на авайди шалфейдин чайдихъ галаз ишлемишун гзаф хийирлуни я, тIям­луни.

—            Катаракта авайла, са ичинин юкь михьи авуна, аниз вирт вегьена, кIаник патай тIвек  акъудна, стакандал эцигна, пакамдалди тада. Экуьнахъ стакандиз авахьнавай миже йикъа  кьве сеферда гьар са вилиз 2 стIал вегьеда.

—            Кьилин къати тIалар авайла, 20 г прополис 100 г спиртда ва я са стаканда авай эрекьда цIурурда. Кьилин тIал башламишнамазди, фан кIусунал настойкадин 40 стIал вегьена неда. ТIал фад секин жеда.

—            КIвачер дакIунвайла, кушдин (лен) тум  ругур гьалима хъун  хийирлу я. Ам икI гьа­зурда: чайдин кьуд тIуруна авай кушдин тумунал са литр яд илична, 10-15 декьикьада ругуна, катул чими чкада эцигна, са сятда тада. Гьалима куьз тавуртIани жеда. Дад хъсан хьун патал аниз лимондин ва я маса майвадин миже яда. Гьалима гьар кьве сятдилай йикъа 6-8 сеферда куз-куз стакандин кьатIа авайди хъвада. 2-3 гьафтедилай куьне нетижа гьиссда.

Гьазурайди — Надият Велиева