Алатай йисуз Дагъустанда медицинадин техникадин цIийи тадаракар маса къачуниз 312 миллион манат пул чара авунвай.
“Лезги газетдиз” Дагъустандин здравоохраненидин министерстводин пресс-къуллугъди хабар гайивал, республикадин аялрин 32 поликлиникадив алай аямдин медицинадин техникадин цIийи тадаракар агакьнава.
Къейд ийин хьи, медицинадин техникадин 305-дав агакьна цIийи тадаракар тайин макьсаддихъ элкъуьрнавай программа кьилиз акъудунин сергьятра аваз маса къачунва. Абурун арада УЗИ-дин аппаратар, офтальмологдин ва оториноларингологдин кабинетриз герек къведай тадаракар, дефибрилляторар, электрокардиографар… ава. Йисан эхирдалди мад 70-дав агакьна тадаракар маса къачун планрик ква.
2018-йисуз медицинадин техникадин тадаракар маса къачуниз республикада 312 миллион манат пул чара авунвай. Адакай 15 миллион — республикадин, амайди, федеральный бюджетдин такьатар тир.
РД-дин здравоохраненидин министрдин заместитель Раиса Шагьсиновадин фикирдалди, цIийи тадаракри диагноз эцигунин жигьетдай кьиле тухузвай кIвалахрин ери хъсанарда ва аялрик акатзавай азарар виликамаз винел акъуддай мумкинвал гуда.
“Эгер виликдай азарлу аялар республикадин клиникадин больницадиз Махачкъаладиз рекье твазвайтIа, къенин юкъуз, цIийи тадаракар себеб яз, аялриз чкадал — районра куьмек гуз жезва”, — лугьузва Р.Шагьсиновади.
Агьмед Магьмудов
