И йикъара РД-да авай Россиядин ФСБ-дин сергьят хуьнин рекьяй управленидин векилар Докъузпара райондин Каракуьре хуьруьн агьалийрихъ галаз гуьруьшмиш хьана. Ана Докъузпара райондин кьилин везифаяр вахтуналди тамамарзавай Агьмед Агьмедова, Каракуьре хуьруьн администрациядин кьил Гьасанбег Балабегова ва хейлин хуьруьнвийри иштиракна.
Малум тирвал, агьалийри хуьруьн майишатда ишлемишзавай мулкар РФ-дин гьукуматдин сергьят алай чкадилай вад километрдин мензилдик акатзава. Гьавиляй жемят, а мулкара чпин майишатдин кIвалахар кьилиз акъуддайла, четинвилерал ацалтзава. Ихьтин гьалар себеб яз, ФСБ-дин векилри сергьятрин зонада инсанри чеб гьикI тухун лазим ятIа, гьадахъ галаз алакъалу месэлаяр каракуьревийрихъ галаз веревирдна.
Къейдна кIанда хьи, 2013-йисан майдиз Россиядинни Азербайжандин арада авай гьукуматрин сергьят тайинарунин комиссиядин заседанидин кIвалахдин вахтунда Докъузпара райондин са кьадар мулкар Азербайжандик акатна. Райондин хуьруьн майишат вилик финин карда еке метлеб авай мулкар ишлемишунин мумкинвиликай магьрум хьайи агьалийрик къалабулух акатун тажуб жедай карни туш.
Гаф кватай чкадал рикIел хкиз кIанзава хьи, Азербайжандинни Россиядин сергьят себеб яз, Къалажухрин агьалийрин хуьруьн майишатдизни еке зиян хьана. Чил Азербайжандин мулкарик акатнавач лугьузватIани, виш йисаралди Къалажухрин жемятди мал-хеб хвейи Къежел тIвар алай яйлахдиз адан сагьибривай хъфиз жезмач. Яйлахдиз фидай рехъ гуя Азербайжандин мулкарал ацалтзава лугьуз, аниз финал къадагъа алаз са шумуд йис я.
Са гафуналди, госсергьят тайинардайла, патарив гвай хуьрерин агьалийрин итижар гьич фикирда кьунвач. Комиссиядин кIвалахда сергьятдин патав гвай районрин кьилериз иштиракдай мумкинвал тагунилай гъейри, сергьят тайинарун патал туькIуьрай проектрихъ галаз вахтунда танишарни авунач.
Россиядинни Азербайжандин арада авай сергьятдин цIар тайинарунин нетижада Каракуьредин жемятдин яйлахдиз (1500 гектар), “Гьачадашдин уьруьшар” тIвар алай векь ядай мулкариз (110 гектар) финал сергьятрин зонадин къайдайралди сергьят эцигна. Гатун вахтунда гьайванар хуьдай 1500 гектар чил Азербайжандик акатна. А чкайриз исятда Азербайжандик акатнавай мулкарай гьамиша рехъ авай.
Агьалийри къейдзавайвал, гила а уьруьшриз фин патал кьве сеферда гьукуматдин сергьятдилай элячIна кIанзава. Ихьтин четинвилер арадал атунихъ галаз алакъалу яз, гуьруьшдин вахтунда агьалийри чпин наразивал малумарна.
Гуьруьшдин нетижада тIвар кьунвай участокриз хуьруьн агьалияр финин гьалар къайдадик кутун патал кьве терефдин арада икьрар кутIунун Дагъустандин Республикадин руководстводивай тIалабдай къарар кьабулна.
Месэладин патахъай за и хуьруьнви муаллим, анин тарих, мулкар хъсандиз чизвай агъсакъал Халилбег Эмирчубановавай баян гун тIалабна.
— Гуьруьшдал яйлахдиз фидай рехъ ачухунин месэла веревирдна. Исятда яйлахдиз малар анжах дагъдин хаталу ва гуьтIуь жигъирдай гьалдай мумкинвал ава. Анай малар гьалун чна хаталу яз гьисабзава. Чаз чи мулкариз са четинвални авачиз фидай рехъ ахъайна кIанзава. И месэладин патахъай алай вахтунда чна республикадин ва уьлкведин кьиле авайбуруз чар кхьенва. Чна месэла дуьз гьялуник, гьахъ винел акъатуник умуд кутазва. Чахъ гьахъ субутдай делиларни ава, — къейдна Халилбег Эмирчубанова.
Куругъли Ферзалиев
