2019-йисан 17-февралдиз хуьруьн майишатдин илимдин доктор, профессор Римиханов Нурмегьамед Идрисовича 70 йисан юбилей къейдна. Ам Мегьарамдхуьруьн райондин Вини Ярагърин хуьре муаллимрин хизанда дидедиз хьана. 1967-йисуз ада Кьасумхуьруьн юкьван мектеб акьалтIарна ва Дагъустандин СХИ-дин зоотехникадин факультетдик экечIна.
Институт акьалтIарайдалай гуьгъуьниз Дербентдин къушчивилин фабрикада бройлеррин отделенида бригадирвиле кIвалахна. Гуьгъуьнлай Н.Римихановаз Дагъустандин НИИСХ-диз кIвалахал эверна, ана ада сифте лаборантвиле, ахпа илимдин рекьяй ахтармишунин отделда къад йисуз кIвалахна.
И вахтунда Н.Римиханова, кIвалахни ийиз, аспирантурадани кIелзавай. 1986-йисуз ВИЖ-да диссертация хвена ва хуьруьн майишатдин илимрин кандидатвилин дережа къачуна.
Ам майишатра гьайванриз тIуьн гудай къайдайрин рекьяй пешекар я.
Гуьгъуьнлай К.А.Тимирязеван тIварунихъ галай МСХА-дин хпехъанвилин ва зоотехникадин лабараторияда докторантурадиз гьахьна. Ина академик Н.И. Клейменов ва профессор А.И. Ерохин адан илимдин рекьяй консультантар тир. 2000-йисуз ада, Дагъустандин шартIара хиперин тIуьнин къурулуш” темадай докторвилин диссертация хвена.
2000-2002 йисара алим РГАЗУ-да гьайванриз тIуьн гунин ва алаф гьасилунин рекьяй кафедрадин профессор тир. Эхиримжи цIерид йисуз МГУПП-да профессор я.
Илимдинни педагогвилин кIвалахдин вахтунда Н.И. Римиханован гъиликай 150-далай гзаф илимдин кIвалахар, учебникар, пособияр, монографияр, методикадин къалурунар хкатна, адан гъилик дипломдин 25-далай артух дипломдин кIвалахарни гьазурна.
Лейла Шерифова
