Мегьарамдхуьруьн райондин хуьруьн майишатдин суьрсет гьасилзавайбур патал къизгъин вахт давам жезва. Ина исятда емишрин бегьер кIватIунин кIвалахар худда кьиле физва. ПIинийрин бегьер вахчуна куьтягьнава. Гила лагьайтIа, райондин майишатра хутар кIватIзава. Гуьгъуьнлай маса культурайрин бере агакьда — гьелелиг абуру йикъалай-къуз гзаф ширинвал кIватIзава.
Райондин кьил Фарид Агьмедова къейдзавайвал, муниципалитетдин экономикадин асул хилерикай сад хуьруьн майишат я. КьетIен фикир ина багъманчивилиз гузва. Районда хуьруьн майишатдин хел вилик тухун патал вири шартIар — гьам кьиблепатан хъуьтуьл гьава, гьамни берекатлу чил ава.
РикIел хкин, емишар гьасилунин рекьяй Мегьарамдхуьруьн район Дагъустанда кIвенкIвечи чкадал ала. ИкI, хутарин девлетлу бегьер “Гранит” СПК-да кIватIзава.
Хутарин ватан Юкьван Азия я. Гьисабзавайвал, и набатат алучадин ва къакъварин сортар сад-садак какадарунин нетижада 2 агъзур йис идалай вилик арадал гъанай. Гьаниз килигна, и емишрин дадни ширинди ва сивер рутIудай хьтинди я.
“Гранит” СПК-да кIватIзавай “Раджабли” сорутунин хутарихъ ширин дад ава. Абур яргъал рекьизни тухун патал кутугайбур я. И хутар гьам тазазмаз, гьамни консервияр авуна ишлемишиз жеда.
Бегьер кIватIунин сифте нетижайри къалурайвал, цIинин йисузни хутарин дад ва ери лап хъсанзава. Тарарин хилер, емишрин заланвал эхиз тежез патахъ жезва. Гьаниз килигна, алатай йисуз хьиз, цIини ина девлетлу бегьер вахчун фикирда ава. ИкI, майишатда са гектар багъдай 20 тонн хутар кIватIзава. Алай йисуз ина 3 гектардай 60-70 тонн хутарин бегьер вахчун гуьзлемишзава.
Бегьер кIватIунин карда, Уружба хуьруьнэгьлийрилай гъейри, патарив гвай маса хуьрерин, гьакIни Дербент шегьердин агьалийрини иштиракзава. Зегьметдин къулай шартIар ва вахт-вахтунда мажиб гун себеб яз, абур иниз ашкъидивди къвезва.
“Невадин алишверишдин компания” карханадин руководитель Юсиф Абдуллаева къейдзавайвал, ада гьар йисуз маса къачузвай экологиядин жигьетдай михьи суьрсет Россиядин базарриз, кьилди къачуртIа, Санкт-Петербургдиз агакьарзава. Ана кьиблепатан емишар кеферпатан региондин агьалийри рикI алаз маса къачузва.
“НТК” фирмадин руководителди гьакIни Мегьарамдхуьруьн райондин кьилиз чухсагъул лугьузва, гьикI хьи, Ф.Агьмедов райондин мулкунал хуьруьн майишатдин хел вилик тухун патал къулай шартIар тешкилиз, суьрсет гьасилзавайбуруз куьмекар гуз алахъзава.
Чи мухбир
