Мегьарамдхуьруьн райондин администрациядин пресс-къуллугъди хабар гайивал, райондиз РД-дин Гьукуматдин Председателдин заместитель Владимир Лемешко кьиле аваз делегация атана. Муниципалитетдин кьил Фарид Агьмедовахъ галаз санал мугьманри районда эцигиз гъиле кьунвай образованидин идарайрин дараматрал кьил чIугуна. КIвалахар кьиле физвай гьалдикай абуруз Ф.Агьмедова суьгьбетна.
Къейд авун лазим я хьи, райцентрада аялрин бахчайралди таъминарна кIанзавай бицIекрин кьадар гзаф я. И кар фикирда кьуна, Мегьарамдхуьре 60 чкадин аялрин бахча эцигдайвал я. И хуьре 8 агъзурдалай виниз агьалияр яшамиш жезва. Идалай гъейри, райондин мулкунал алай пограничникрин хизанрани хейлин аялар ава. Аялрин бахча ишлемишиз вахкайла, нубатда акъвазнавай аялрин кьадар тIимил жеда.
Уружбайрин агьалийри, иллаки школадин коллективди, цIийи дараматдикай фикир ийиз гзаф вахт тир. Хуьруьн школадин дарамат алай аямдин истемишунриз жаваб гудай гьалда амачир. Ина аялри пуд сменада кIелзава. Гила хуьре 304 аялди кIелдай цIийи дарамат эцигдайвал я. Администрацияди чил чара авунва. Образованидин идара ишлемишиз вахкайла, пуд сменани амукьдач, диде-бубайри куьгьне школада кIелзавай аялрин гьакъиндай секинсузвални гьиссдач. Аялрихъни вири жуьредин шартIар тешкилнавай школада кIелдай мумкинвал жеда.
Къейд авун лазим я хьи, эхиримжи йисара РД-дин Гьукуматди шегьерра ва гьакI хуьрерани аялар бахчайралди таъминарунин месэладиз еке фикир гузва. РД-дин Гьукуматдин Председатель Артем Здунова лагьайвал, регион тамамвилелди аялрин бахчайралди таъминарун кар алай везифайрикай сад я.
Мугьманар гьакI “Шегьердин къулай шартIар тешкилун” программа кьиле тухузвай гьалдихъ галазни таниш хьана. И программадин бинедаллаз гъиле авай йисуз Уружба, Къуйсун ва Ярагъ-Къазмаяр хуьрера аваданламишунин кIвалахар тухуда ва паркар арадал гъида.
Эцигунар кьиле тухудай майданрихъ галаз таниш хьайила, райондин администрацияда и месэлаяр мадни веревирд хъувуна. Гьа са вахтунда Фарид Агьмедова атанвай мугьманриз Ярагъ-Къазмайрин мискIиндиз яд гъунин месэлани кудна. ГьакIни къейдна хьи, район сергьятдин зонадик акатзава, и кар фикирдай акъудна виже къведач.
Райондин векилри къарагъарай вири месэлайрин гьакъиндай Владимир Лемешкоди гъавурда туна ва талукь идарайриз тапшуругъар гана.
Чи мухбир
