Аллагь-Таалади лагьана: “…куьне харж авур затIар Ада квез эвез хъийида…” (“Саба”, 39).
Ибн Масуда агакьарайвал, Пайгъамбарди ﷺ лагьана: “Кьве ери авайбурулай гъейри, садални пехил хьана кIандач: Аллагьди девлет ва ам са затIни амачиз лазим къайдада харждай мумкинвал ганвай инсандал ва Аллагьди арифдарвал ганвай, гьа арифдарвилел бинеламиш хьана, дуван ийизвай ва ам масабурув агакьарзавай касдал” (Аль-Бухари, Муслим).
Ибн Масуда лагьана: “Садра Аллагьдин Расулди ﷺ инсанривай хабар кьуна: “Низ варисдин девлет вичин девлетдилай гзаф кIанзава?” Абуру лагьана: “Жуван девлет гзаф кIан тийидай кас чи арада авач”. А вахтунда ада лагьана: “Гьакъикъатда, гьар са касдин девлет ада харж авур затI я, амма эцигай затI адан варисдин девлет я!” (Аль-Бухари).
Ади бин Хатима агакьарайвал, Пайгъамбарди ﷺ лагьана: “Куьн жегьеннемдин цIукай хурмадин са паюнал кьванни хуьх” (Аль-Бухари, Муслим).
Жабира лагьана: “Аллагьдин Расулдивай ﷺ вуч тIалабайтIани, ада садрани “ваъ” лагьанач” (Аль-Бухари, Муслим).
Абу Гьурайради агакьарайвал, Аллагьдин Расулди ﷺ лагьана: “Гьар юкъуз Аллагьдин лукIар пакамахъ ахварай аватайла, цаварилай кьве малаик эвичIзава. Абурукай сада лугьузва: “Я Аллагь, харжзавайдаз эвез хъия!” Муькуьда лугьузва: “Я Аллагь, мутIлакьди кьиникьал гъваш!” (Аль-Бухари, Муслим).
Абу Гьурайради агакьарайвал, Аллагьдин Расулди ﷺ лагьана: “Харж ая, эй Адаман хва, а чIавуз вун паталдини харж ийида” (Аль-Бухари, Муслим).
Абу Кабш Умара бин Сада аль-Анмариди агакьарайвал, адаз Аллагьдин Расулди ﷺ икI лугьудайла ван хьана: “За квез пуд затIуна кьин кьада ва са затI лугьуда, куьне абур рикIел хуьх! За кьин кьазва, садакьади лукIран девлет тIимилардач, нагагь адахъ галаз гьахъсузвилелди рафтарвал авуртIа ва ада сабур хвейитIа. Аллагьди адан машгьурвал артухарда, эгер лукIра инсанривай тIалабунин ракIа-рар ахъаяйтIа, Аллагьди адан вилик кесибвилин ракIарар ахъайда!
«Ас-салам» газетдай
( КьатI ама )
