И йикъара малум хьайивал, алай йисан 8-сентябрдиз Мурманский областда кьиле фидай губернатордин сечкийра иштиракун патал чи ватанэгьли Къариб Разаханович Гьажимегьамедован кандидатурани къалурнава.
Къ.Гьажимегьамедов 1960-йисан 9-майдиз Хив райондин Вини ЗахитIрин хуьре дидедиз хьана. Ада ана муьжуьд йисан мектеб тафаватлудаказ куьтягьна. КIелай йисара ада райондин олимпиадайра агалкьунралди иштиракиз хьана. 1980-йисуз Дагъустандин политехнический техникум ва 1987-йисуз Астрахандин балугърин промышленностдинни майишатдин технический институтдин механический факультет куьтягьна, инженер-механиквилин пеше къачуна.
Астрахандин балугърин комбинатда чIехи инженер-механиквиле, “Главный Сулак” балугърин комбинатда кьилин инженервиле, Дагъустандин “Дагэлектромаш» заводдин цехдин начальниквиле, “Стекловолокно” заводда, “Дагрыбпром” карханада кьилин энергетиквиле кIвалахна. Вини дережадин тежриба авай пешекардихъ илимдин рекьелди ахтармишнавай жуьреба-жуьре шейэр туькIуьрунин, кIвалах хъсанарунин 40 кьван теклифар ава.
Къариб Гьажимегьамедов 1995-йисуз Мурманскдиз куьч хьана ва ана “Система” АОЗТ-да директордин заместителвиле кIвалахиз башламишна. Ам Кольский полуостровдин дараматар, кIвалер чими авунин система къайдадик кутунин кардал машгъул хьана. 1998-йисуз вичин хсуси “Теплоэнергомаш” тешкилат (ООО) арадал гъана, 2015-йисалди адан кьиле авай. Тешкилат арадал гъайидалай кьулухъ ада Кольский полуостровда са жерге котелрин чкаяр, подстанцияр, электричество гудай линияр туькIуьрна. Адан регьбервилик кваз чимивал гудай генераторни арадал гъана. Алай вахтунда ам, Россиядин ва къецепатан уьлквейрин карханайрин куьмекни галаз, энергия кьенятдай технологиядал машгъул я.
Къариб Разаханович нафтIадинни газдин промышленностдин “Мурманшельф” ассоциациядин член я. 2009-йисуз Мурманск шегьердин администрациядин кьилин сечкийра иштиракна. 2013-йисуз адаз “РФ-дин лайихлу энергетик” тIвар гана. Гьа йисуз ам Мурманский областдин эцигунардайбурун союздин членвиле кьабулна. Адахъ жуьреба-жуьре йисара ганвай наградаяр гзаф ава. Машгьур пешекардин тIвар “Россиядин агалкьунар хьанвай ксарин биографийрин къейдер” ктабдани гьатнава.
2016-йисуз пенсионеррин партияди Къариб Гьажимегьамедован кандидатура Мурманский обласдин ва РФ-дин Госдумадин депутатрин сечкийра иштиракун патал къалурнай. Ада “Мурманское морское пароходство” ПАО-да кьилин инженервилени, эцигунрин “Стройэнерго” тешкилатдин генеральный директорвилени кIвалахна. 2017-йисалай Мурманскдин балугърин комбинатда кьилин инженер я.
Алакьунар авай пешекар сечкийра къуй гъалиб хьурай.
Куругъли Ферзалиев
