“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, 1-июлдиз Владимир Васильева 1999-йисуз жергедин агьалийрикай Дагъустандин мулкарал кьиле фейи дяведин гьерекатра иштиракай ксарин (ополченцы) сиягьар къайдадик кутуниз талукьарнавай совещание кьиле тухвана.
РикIел хкин, мукьвара “Прямая линия” лишандик кваз Россиядин Президент Владимир Путинахъ галаз интернетдин куьмекдалди кьиле фейи гуьруьшдин вахтунда 1999-йисан вакъиайрин иштиракчийри уьлкведин регьбердивай чпиз дяведин гьерекатрин ветеранрин дережа гун тIалабнай. Путина абурун теклифдин тереф хвенай.
Совещанидин вахтунда Владимир Васильева веревирдзавай месэладин важиблувал къейдна:
«Президентди, яргъал вегьин тавуна, сиягьар къайдадик кутунин ва и месэлани гьялунин тупшуругъ ганва. Им чи ватандашриз, Дагъустан хуьз экъечIайбуруз талукь кар я. Гуьгъуьнлай са шумуд сеферда къейд авурвал, терроризмдиз акси гьерекатар кьиле тухунин кIвалахни гьа и чIавалай гатIунна”.
Совещанидин кIвалахда РД-дин Гьукуматдин Председатель А.Здунова, РД-дин Кьилин ва Гьукуматдин Администрациядин Руководитель В.Иванова, РД-дин Гьукуматдин Председателдин Сад лагьай заместитель А.Къарибова, республикадин вице-премьер Р.Жафарова, РД-дин къенепатан крарин министр А.Мегьамедова, РД-дин зегьметдин ва яшайишдин рекьяй вилик финин министр И.Мугутдиновади, Дагъустандин военком Дайтбег Мустафаева ва масабуру иштиракна.
«Лезги газет»
