ФЛНКА-дин (Лезгийрин милли медениятдин федеральный автономия) пресс-къуллугъди “Лезги газетдиз” хабар гайивал, алай йисан 6-июндиз ООН-дин экономикадин ва яшайишдин Советди лезгийрин тешкилатдиз консультативный махсус статус ганва.
И кардихъ гьихьтин кьетIенвилер ава? Сифте нубатда, ихьтин статусди тешкилатдиз ООН-дин экономикадин ва яшайишдин Советдихъ, адаз талукь органрихъ, Секретариатдихъ, программайрихъ, фондарихъ, идарайрихъ галаз сих алакъаяр хуьдай мумкинвал гузва. Гила ФЛНКА-диз ООН-дин Нью-Йоркда авай кьилин идарайра ва Женевадани Венада авай отделенийра чпин векилар тайинардай ихтияр ава. Абурукай гьар садавай, са манийвални авачиз, ООН-дин винидихъ тIвар кьунвай офисриз физ жеда. Амма идалди тешкилатдиз цIийи статусди ганвай “савкьатар” куьтягь жезвач. ФЛНКА-дивай ООН-ди кьиле тухузвай международный конференцийра, маса мярекатра иштиракиз, анра кхьиналди ва рахуналди арзаяр ийиз, ООН-дин майданрал мярекатар тешкилиз ва са жерге маса крар кьилиз акъудиз жезва. Абурукай гегьеншдиз “Лезги газетдин” сайтдай кIелиз жеда.
Са гафуналди, консультативный статусдихъ еке къуват, мумкинвилер ава. ФЛНКА-дин вилик чи халкьдин тIал алай месэлаяр дуьньядин дережадин майданриз акъуддай цIийи рекьер ачух хьанва.
Чи мухбир
