Дагъустандин УФАС-дин (Управление федеральной антимонопольной службы) виликан регьбер Кубасай Кубасаеваз вад йис кар ганва. Идакай ТАСС-ди хабар гузва.
Москвадин Лефортовский судди ам 2 миллионни 500 агъзур манат пул ришвет къачунай тахсирлу тирди тестикьарна. Чешмедин делилралди, дустагъдилай гъейри, адал 300 агъзур манатдин кьадарда аваз жермени илитIнава.
Россиядин Силисдин комитетдин векил Светлана Петренкодин гафаралди, К.Кубасаеваз талукь делодин сергьятра аваз силисдин органри кIватIай субутардай делилар суддиз Дагъустандин УФАС-дин виликан регьбер тахсирлуди яз малумарун патал бес хьана.
Чешмеди хабар гузвайвал, 2013-2015-йисара К.Кубасаева РД-дин “Дирекция единого государственного заказчика-застройщика” ГКУ-дин директор Шамил Кьадиевавай, ришвет яз, 2 миллион манат пул, Швейцариядин сят ва гъуьрчехъандин тфенг къачуна.
Чи мухбир
