КIелунин 2018-2019-йисуз Сулейман-Стальский райондин образованидин тешкилатра кIелзавайбуру Вирироссиядин ва республикадин олимпиадайрин нетижада 34 приздин чка кьуна. Идакай «Лезги газетдиз» райадминистрациядин пресс-къуллугъди хабар гузва.

Кьулан СтIалрин, ЦIийихуьруьн, Агъа СтIал-Къазмайрин, ЦицIигърин, Курхуьруьн 2-нумрадин, Герейханов хуьруьн 2-нумрадин, КIварчагърин, Алкьвадрин ва ЦIийи-Макьарин мектебра кIелзавайбуру литературадай, математикадай, хайи чIалай, биологиядай, физкультурадай кьиле фейи олимпиадайра, жуьреба-жуьре яратмишунрин конкурсра, илимдинни ахтармишунрин кIвалахра активнидаказ иштиракна.

Кьилди къачуртIа, Кьулан СтIалрин мектебда кIелзавай Лейла Гьажимурадовани Перихалум Мегьамедова Вирироссиядин яратмишунрин «ХъуьтIуьн мах» конкурсда  гъалиб хьана. Гьа и мектебдай тир Шамсият Сафаралиевади Етим Эминан 180 йисан юбилейдиз талукь яз 2018-йисуз Кьиблепатан Федеральный округда хайи чIалай тухвай олимпиадада ва 2019-йисуз республикадин «Ата-бубайрин чIал» конкурсда 1-чка кьуна.

Къейдна кIанда хьи, ихьтин мярекатри аялрик гьевес кутазва, яратмишунин рекьяй вилик фидай мумкинвал гузва.

«Лезги газет»