РагъэкъечIдай патан Африкада авай Танзания набататрин ва гьайванрин жигьетдай ана виридалайни надир уьлкве яз гьисабзава. Дугъриданни, тIебиатдин девлетлувилел гьалтайла, анив къведай чка авач. 15 милли парк, вирер, ажайиб дагълар, гьа жергедай яз — Килиманджаро.
Уьлкведа 50 миллиондив агакьна инсанар яшамиш жезва. 1996-йисалай анин меркез Додома шегьер я. Уьлкведа ингилис ва суахили чIалар официальныйбур яз ишлемишзава. Нгоронгоро тIвар алай милли паркуна 30 агъзурдалай виниз гьайванар ава: чIурун балкIанар, бегемотар, гамишар, жейранар, лекьенар, миргер, асланар, филер, носорогар ва масабур.
Африкада авайни-авачир Китуло тIвар алай набататрин милли паркни Танзаниядин сергьятра ава. Гзаф кьадарда жуьреба-жуьре цуьквер, 350-далай виниз набататрин жуьреяр, 40-далай гзаф орхидея цуькведин жуьреяр авайвиляй милли паркунал “Аллагьдин багъ” тIвар акьалтнава. Набататрин паркуна тек-туьк дуьшуьш жедай Африкадин кьукь къушни яшамиш жезва.
Гьазурайди — Куругъли Ферзалиев
