И сеферда заз газет кIелза­вайбур Москвадин областдин Ивантеевка шегьерда кIвалах­завай духтур-кардиолог, ультразвуковой диагностикадин рекьяй пешекар, медицинадин илимрин кандидат  Арабова  Гуьльнара  Рашидовнадихъ  галаз танишариз кIанзава.

Ам 1971-йисан 4-сентябрдиз Махачкъала шегьерда къуллугъчийрин хизанда дидедиз хьана. Адан буба, машгьур къурушви  Рашид Халидович экономикадин илимрин кандидат тир. РФ-дин хуьруьн майишатдин ва недай суьрсетдин министерстводин са отделдин начальникдин замес­тителвиле кIвалахна; диде Иминат Ярагь­медовна пешедин рекьяй инженер-технолог я.

Гуьльнаради 1989-йисуз Ивантеевка шегьердин 6-нумрадин мектеб куьтягьна. 1990-йисуз Н.И. Пирогован тIвару­нихъ галай медуниверситетдик экечI­на. Вуз куьтягьай жегьил пешекарди вичин зегьметдин рехъ Ивантеевка шегьердин ЦГБ-дин кардиологиядин отделенида кIвалахунилай башламишна. 2001-2003-йисара ада кардиологиядин, функцио­нальный ва ультразвуковой диаг­ностикадин ре­кьяй Москвадин областдин М.Ф. Владими­ров­ский­дин тIва­ру­нихъ галай илим­динни ахтармишунрин клинический институтдин ординатурада кIелна.

Илимдин рекьяйни виликди финин къаст авай пешекар ординатура куьтягьайдалай кьулухъ гьа институтдин аспирантурадик экечIна. Медицинадин илимрин кандидатвилин тIвар къачурдалай гуьгъуьниз, 2007-йисуз, ам Ивантеевка шегьердин ЦГБ-диз хтана ва гилани ана кIва­лахзава. Гьа са вахтунда ада “Зи духтур” тIвар алай ме­ди­цинадин центрадани кардиологвиле зегьмет чIугвазва.

Ада датIана тежриба ва чирвилер артухарунин кардизни фи­кир гузва. ИкI, А.Л.Мясникован тIварунихъ га­лай РФ-дин здравоохраненидин клиникадин кардиологиядин институтда ва медицинадин илимрин маса центрайра пешекарвилин дережа хкажунин курсара хьана.

И мукьвара Москвадин об­ластдин­ Думади, медицинадин къул­лугъ­чийрин пешекарвилин суварин вилик кIвалахда вини дережадин нетижаяр къазанмишнавай машгьур духтуррин гзаф йисарин гьакъисагъ зегьмет чухсагъулдин чараралди, пишкешралди къейдна. Шабагьриз лайихлу хьайибурун арада медениятдин “Дагъустан” центрадин президиумдин член, медицинадин “Зи духтур” центрадин кардиолог Гуьльнара Арабовани авай.

Чаз ватанэгьлидихъ мадни кьакьан дережаярни  агалкьунар хьана кIанзава.

Куругъли Ферзалиев