1-июлдиз Сулейман-Стальский райондин администрацияда мектебра лап хъсан кIелайбурув «КIелунра хьайи кьетIен агалкьунрай» медалар ва яру аттестатар шад гьалара вахкунин мярекат кьиле фена. Идакай «Лезги газетдиз» райадминистрациядин пресс-къуллугъди хабар гузва. 

Алай йисуз райондин 26 аялди лап хъсан къиметралди кIелунай наградаяр къачуна. КьетIен мярекатда райондин кьил Нариман Абдулмуталибова, адан сад лагьай заместитель Лацис Оружева, образованидин начальникдин везифаяр тамамарзавай Гуьсейн Шихбабаева, образованидин тешкилатрин кьиле авайбуру, муаллимри, выпускникри ва абурун диде-бубайри иштиракна.

Райондин кьили выпускникриз тебрикдин хуш келимаяр лагьана, абуруз экуь гележег ва еке агалкьунар хьун алхишна. Райондин кьили аялриз тарсар гайи муаллимризни, абурун диде-бубайризни кьилди чухсагъул малумарна.

Тебрикдин гафар Л.Оружевани, Гь.Шихбабаевани, медалар къачур кьве выпускникдин чIехи буба Загьир Гьажимирзоевани лагьана.

Гуьгъуьнлай райондин кьили выпускникрив къизилдин медалар, яру аттестатар, чухсагъулдин чарар ва «Лезги халкьдин 100 мани» ктабар вахкана. Адет тирвал, шад мярекат выпускникри рикIел аламукьдай шикилар ягъуналди куьтягь хьана.

 «Лезги газет»