Алатай гьафтедин ял ядай йикъара Махачкъалада, Расул Гьамзатован тIварунихъ галай Милли библиотекада, Кеферпатан Кавказдин стоматологиядин III форум ва “Каспий-Дентал-2019” лишандик кваз выставка кьиле фена. Мярекатрин тешкилатчияр “Махачкъаладин пешекарвал хкаждай центр”, Дагъустандин стоматологрин ассоциация, “Каспий” тIвар алай КСИ (клуб стратегических инициатив) автономный коммерциядинди тушир организация (АНО) тир. РФ-дин Госдумадин сагъламвал хуьнин рекьяй Комитетди, РД-дин здравоохраненидин министерстводи, Дагъустандин Халкьдин Собранидин сагъламвал хуьнин ва яшайишдин политикадин рекьяй Комитетди, Дагъустандин госмедуниверситетди мярекатдин тереф хвена. Ана неинки Дагъустандин, гьакIни Кеферпатан Кавказдин саки вири регионрин векилри иштиракна.
Форум ачухдайла, Махачкъаладин пешекарвал хкаждай центрадин директор Мегьамед Абакарова къейд авурвал, республикада 3-сеферда кьиле тухузвай серенжемдин важиблувал а кардикай ибарат я хьи, ана стоматологриз неинки чпин пешекарвал хкаждай, гьакIни чпиз кIвалахда лазим къвезвай алатар арада масад авачиз маса къачудай, абурал кIвалахиз чирдай, Россияда медицинада, кьилди къачуртIа, стоматологиядин хиляй тадаракар ва лазим маса шейэр акъудзавайбурухъ галаз гележегда амадагвилин алакъаяр мягькемардай мумкинвални хьана.
Форумдин кьвед лагьай йикъан сергьятра аваз илимдинни тежрибадин конференция ва семинарар кьиле фена.
Рагнеда Рамалданова
