Духтурвал (муаллимвилин пеше хьиз) гзаф жавабдарди, гьакъисагъвилелди кIвалахунилай гъейри, инсанрихъ галаз хуш рафтарвал, датIана эдебдин къайдаяр хуьн, куьмек герекзавайбуруз сабурлувилелди къуллугъун истемишзавай пеше я. Зун гьеле Гиппократан кьинез вафалу хьуникай рахазвач…
Къенин ихтилат медицинадин хиляй вичихъ лап хъсан чирвилерни тежриба авай духтур Наида Гъанифаевна Уружевадикай я. Ам 1988-йисуз Махачкъалада къуллугъчийрин хизанда дидедиз хьана. Адан буба — кьасумхуьруьнви Гъанифа Агьмедулаевич — Дагъустандин хуьруьн майишатдин институтдин къуллугъчи тир. Диде — Саида Зибиулаевна — ДГМУ-дин акушервилинни гинекологиядин кафедрадин доцент, акушер-гинеколог ва хирург я. Алай вахтунда ада Махачкъаладин 2-нумрадин аялар хадай кIвалин гинекологиядин оперативный отделенида кIвалахзава.
2004-йисуз шегьердин 18-нумрадин мектеб къизилдин медалдалди куьтягьай Наида ДГМУ-дин сагъардай факультетдик экечIна. 4-курс акьалтIарай руш уьмуьрдин юлдашдихъ (а чIавуз ада хатасузвилин органра кIвалахзавай) галаз кьисметди Владивосток шегьердиз акъудна. ВГМУ-да кIелун давамар хъувур Н.Уружевади 2010-йисуз анаг яру дипломдалди куьтягьна. Ина ада акушервилинни гинекологиядин рекьяй пешекарвилин дережани къачуна. 2012-йисуз Санкт-Петербургдиз акъатайла ана дишегьлийриз меслятар гудай центрада акушер-гинеколог яз кIвалахун давамарна. 2014-йисуз ам Санкт-Петербургдин И.Мечникован тIварунихъ галай СЗГМУ-да (Кеферпатанни РагъакIидай патан госмедуниверситет) пешекарвилин дережа хкаждай курсара хьана.
2017-йисуз ада Москвада А.Е. Евдокимован тIварунихъ галай ФГБОУ-дин ВО-дин МГМСУ-дин репродуктивный медицинадинни хирургиядин кафедрада акушервилинни гинекологиядин, гьакIни “ультразвуковой диагностикадин” хилерайни пешекарвилин дережа хкажна.
2018-йисуз Махачкъаладиз хтайла, тежрибалу духтур “Астрамед” клиникадиз кIвалахал кьабулна.
Наида Гъанифаевна илимдални машгъул я. 2018-йисуз ам Дагъустандин медицинадин акушервилинни гинекологиядин кафедрадин аспирантурадик экечIна. Алай вахтунда ада диссертациядин винел кIвалахзава. Жегьил духтур датIана тежриба хкажунал, чирвилер мадни артухарунал машгъул я. Дагъустан Республикадин милли политикадин министерствода кIвалахзавай уьмуьрдин юлдашдихъ галаз санал Наида духтурдин хизанда 3 хва чIехи жезва.
Къейд тавуна жедач, Наида Уружевади, интернетдин мумкинвилерикай менфят къачуналди, галатун тийижиз, инсанриз вичелай алакьдай куьмекар, меслятар гузва. Духтурдихъ инсанри и жуьреда ихтибар авуни, датIана адавай меслятарни куьмекар вилив хуьзвайбурун кьадар артух хьуни, шаксуз, адан пешекарвилин виниз тир ерийрин гьакъиндай шагьидвалзава.
Къуй бажарагълу духтурдихъ зегьметдин, илимдин рекьера еке агалкьунар, хизанда мадни хушбахтвал хьурай!
Куругъли Ферзалиев
