И йикъара Мегьарамдхуьруьн райондин администрацияда райондин мектебрин выпускникрив «КIелунра кьетIен агалкьунар хьунай» къизилдин медалар ва кьетIен жуьредин аттестатар шад гьалара вахкунин мярекат кьиле фена.
Мегьарамдхуьруьн райондин администрациядин пресс-къуллугъди хабар гузвайвал, алай йисуз вини дережадин наградайриз 19 выпускник лайихлу хьана. Шад мярекатдал выпускникрин диде-бубайризни, мектебрин муаллимризни, директорризни, олимпиадайра, илимдинни тежрибадин конференцийра, конкурсра лайихлу чкаяр кьурбурузни теклифнавай.
Мярекат райондин кьил Ф.Агьмедова ачухна ва агалкьунар хьанвай аялар тебрикна. Ада хъсан чирвилер къачуналди мектеб куьтягьнавайбуру гьам вузра, гьам кIвалахрани агалкьунар къазанмишуналди, гележегдани район машгьур авуник умуд кутазвай гафар лагьана.
Медалистрив райондин кьили лайихлу шабагьар вахкана. Диде-бубайрив, муаллимрив ва конкурсрани олимпиадайра тафаватлу хьайибурув чухсагъулдин чарар вахкана.
«Лезги газет»
