Лезги халкьдин игитвилин «Шарвили» эпосдин суварин гьазурвилер акунин рекьяй республикадин тешкиллувилин комитетди цIинин йисуз премияр гудайбур тайинарунин конкурсдин нетижаяр кьунва.

Сулейман-Стальский райондин администрациядин пресс-къуллугъди хабар гузвайвал, конкурсдин нетижада агъадихъ галай тешкилатар, ксар гъалибчияр яз гьисабнава:

1. Республикадин жемиятдинни сиясатдин газет «Лезги газет» — милли меденият вилик тухуник, хуьник, «Шарвили» эпосдин таблигъат тухуник чIехи пай кутунай ва газетдин вилик квай 100 йисан юбилейдихъ галаз алакъалу яз;

2. СтIал Сулейманан тIварунихъ галай лезгийрин гьукуматдин муздрамтеатрдин коллектив – Дагъустандин театрдин искусство вилик тухуник чIехи пай кутунай, художественный рекьяй Шарвилидин къамат арадал гъунай ва театр арадал атайдалай инихъ 115 йис тамам хьунихъ галаз алакъалу яз;

3. «Сувар» халкьдин ансамбль – милли меденият вилик тухуник, хуьник чIехи пай кутунай ва халисан халкьдин музыкадин адетар кIвачел ахкьалдарунай;

4. Шабатов Шагьабудин Нурдинович – лезги меденият вилик тухуник чIехи пай кутунай ва «Шарвили» эпосдин таблигъат тухунай;

5. Ибрагьимова Марина Абдурежебовна – дурумлувилелди зегьмет чIугунай, илимдин жагъурунра викIегьвал къалурунай, вичин майиллувилихъ инанмишвалунай;

6. Гьажиев Жабраил Гьажиражабович – спортдин рекье чIехи агалкьунар къазанмишунай, руьгьдин къуват ва викIегьвал къалурунай.

Къейд ийин, «Шарвили» эпосдин сувар Дагъустандин умуми сувариз элкъвена са шумуд йис я. ЦIи и сувар 20-сеферда яз пака, 29-июндиз, къадим Ахцегьа кьиле фида. Гъалибчийрив премияр суварин мярекатра шад гьалара вахкуда.

 «Лезги газет»