Мукьвара районра туриствилин кIвалах лап хъсандиз тешкилун патал кьиле тухвай республикадин 1-конкурсдин гъалибчияр къейд авунин мярекат кьиле фена. Дагъустан Республикадин Кьил Рамазан Абдулатипован теклифдалди арадал атай и конкурсда саки вири районри иштиракна.
Конкурсда гъалибвал къачур райадминистрацийрин кьилер РД-дин Гьукуматдин Председателдин Сад лагьай заместитель Анатолий Къарибова тебрикна.
Конкурсда Ахцегь райондин администрациядин ФК-дин, спортдин, жегьилрин крарин ва туризмдин рекьяй кьилин пешекар Назиля Исмаиловади “Ахцегь — ачух цавун кIаник квай музей” темадай презентация авуна. Н.Исмаиловадин презентация ва теклифар Кьиблепатан территориальный округда виридалайни хъсанбур яз гьисабуналди, жюриди Ахцегь райондиз и конкурсда 1-чка гана. Кьвед лагьай чкадиз Дербент шегьер, 3-чкадиз Къайтагъ район лайихлу хьана. Жюриди презентациядин 17 тереф фикирда кьуна къимет гузвай. Гъалибчийрив Анатолий Къарибова, РД-дин туризмдин ва халкьдин художественный сеняткарвилин рекьяй министр Рабият Закавовади дипломар вахкана.
— Конкурсдин тешкилатчияр ва иштиракчияр, ам кьиле тухуник кьил кутурбур, Ахцегь райондин гуьрчегвилиз лайихлу къимет гайи жюри сагърай. ТIебиатди жумартвилелди вири шартIар ганвай чи райондихъ туризм вилик тухун патал еке мумкинвилер ава. Чна авур презентацияда райондин килигуниз лайихлу хейлин чкаяр ва туриствилин вири мумкинвилер къалурнавач. Конкурсдин къайдайри, сергьятри и кар кьилиз акъуддай мумкинвал ганач. Районда кьиле тухузвай культурадин серенжемринни мярекатрин нетижада (абурук лезгийрин игитвилин “Шарвили” эпосдин сувар, манийрин “Лезги сес” конкурс-фестиваль, “Дагъдин форум”, “Ахцегьрин ичерин сувар” ва масабур акатзава) чаз мугьман жезвай туристрин кьадар аквадайвал артух хьанва. Туризм вилик тухунин месэла муниципалитетдин гьар йикъан кIвалахда сад лагьай чкадал ала, гьикI лагьайтIа ам район яшайишдинни экономикадин жигьетдай вилик тухунин карда кьилин шартI я, — лагьана Ахцегь райондин кьил Осман Абдулкеримова.
Нариман Мамедов
