Алай йисан 9-майдин сятдин 9-даз Хасавюрт райондин ЦIийи Къурушрин хуьруьн 1 ва 2-нумрайрин мектебра кIелзавай аяларни муаллимар, гъилера Ватандин ЧIехи дяведин иштиракчийрин суьретар, лозунгар ва плакатар аваз, хуьруьн центрада авай Культурадин кIвал галайвал рекье гьатна. Анал абур хуьруьн вилик-кьилик квайбуру, агъсакъалри ва патарилай хтанвай мугьманри къаршиламишна.
ЧIехи Гъалибвилин 72 йис тамам хьуниз бахшнавай мярекат хуьруьн Культурадин кIвалин директор Къурбанов Захара ачухна. Сифте гаф хуьруьн администрациядин кьил Рафик Юсуповаз гана. Вичин нубатда ада вири къурушвийриз чIехи сувар мубаракна ва дуьнья ислягь хьун, виридахъ кIвалахра еке агалкьунар хьун алхишна.
1-нумрадин юкьван мектебдин лезги чIаланни литературадин муаллим, Дагъустандин лайихлу муаллим Гьажи Къазиева Ватандин чIехи дяведа къурушвийрин жуьрэтлувилерикай ва дяведиз фейи бубайринни стхайрин чкайрал зегьмет чIугур дидейрикайни вахарикай гегьенш доклад авуна.
Гуьгъуьнлай мярекатдал рахай зегьметдин ветеран Исмаилов Агьмеда, агъсакъалрин Советдин председатель Вердиханов Вердихана, хуьруьн имам Панагьов Азим-гьажиди, яргъал йисара хуьруьн школада военрук яз зегьмет чIугур Эбилов Сейфуллагьа, муаллим-шаир Хидиров Шагьназара, ветеран Кьасум Фаталиева дяведин йисар гьикьван агъурбур хьанатIа рикIел хкана. КПРФ-дин Къурушрин хуьре авай отделенидин секретарь Вердиев Закира дяведин йисара зегьмет чIугур дишегьлийриз бахшнавай вичин шиир кIелна.
Мярекатдал гьакIни мектебра кIелзавай аялрини ЧIехи Гъалибвилиз бахшнавай шиирар кIелна. КIватI хьанвайбуруз 2-нумрадин юкьван мектебдин 6″б» классдин ученицайри, Расул Гьамзатован «Дурнаяр» шиирдин бинедаллаз, къалурай гъвечIи сегьне иллаки бегенмиш хьана.
Администрациядин кьилин заместитель, хуьруьн ветеранрин Советдин председатель Малик Шагьвеледова ветеранриз пул авай конвертар ва цуькверин кIунчIар багъишна.
1-нумрадин мектебдин военрук Эскендаров Несруллагьа вичи регьбервал гузвай классда кIелзавай аялрихъ галаз хуьре авай гуьмбетрал цуьквер эцигна.
ЧIехи Гъалибвилин 72 йис тамам хьуниз талукьарнавай шад мярекат Культурадин кIвалин гьевескарри тамамарай манийри мадни гурлу авуна.
P.S.
Ватандин ЧIехи дяведин йисара Докъузпара райондин Къурушрин хуьряй армиядиз 570 касдиз эвер гана. Дяведин вахтунда женгер кьиле фейи майданра ва госпиталра 325 къурушви телеф хьана, 70 – гел галачиз квахьна.
Тамам тушир делилралди, 395 къурушвидиз Ватандин ЧIехи дяведай элкъвена хайи хуьруьз хтун кьисмет хьанач.
Гьажи Къазиев, «Лезги газетдин» Хасавюрт районда авай хсуси мухбир
