Дагъустан Республикадин Кьил Рамазан Абдулатипован 2017-йисан 26-апрелдиз кьабулнавай 90-нумрадин Указдалди, РД-дин Кьилин патав гвай агъсакъалрин Советдин член, РФ-дин юистициядин министерстводин патав тешкилнавай Россиядин правовой академиядин Кеферпатан Кавказда авай филиалда илимдин секретарь яз кIвалахзавай лезги халкьдин бажарагълу руш Зара Агьмедовна Латифовадиз, Дагъустандин вилик лайихувилер къалурунай ва хейлин йисара гьакъисагъвилелди зегьмет чIугунай «Хайи чил кIан хьунай» гьуьрметдин лишан ганва.
Зара Латифова Кьурагь райондин дагъларин къужахда авай Кьуьчхуьррин хуьре – бажарагълу женгчи-шаир Саидан ватанда дидедиз хьана. 1964-йисуз КПСС-дин членвиле кьабулай ам Мегьарамдхуьруьн комсомолдин райкомда кIвалахиз гатIунна. 2 йисан къене кьвед лагьай секретардин везифаяр тамамарна.
Бажарагълу коммунистка Ростовдиз, Высший партийный мектебдиз рекье туна. Амма адаз ина эхирдал кьван кIелдай мумкинвал хьанач, ам Агъул райондин партиядин райкомдин кьвед лагьай секретарвиле тайинарна. 1976-йисуз ам Мегьарамдхуьруьн райондин исполкомдин председателвиле хкяна.
Хци кьатIунар, тешкилатчидин алакьунар авай жегьил пешекар Зара Латифова партиядин обкомдиз кIвалахал хутахна. Адал са отделдин заведующийдин заместителдин везифаяр ихтибарна. 1980-йисан мартдин вацра лагьайтIа, республикадин Верховный Советдин сессиядал ам Дагъустандин пищевой промышленностдин министрвиле хкяна.
Гуьгъуьнлай адакай Верховный Советда халкьдин депутат хьана. Виликди физвай дишегьлиди и вахтунда пуд лагьай кьилин образование къачуна.
1984-1989-йисара Зара Агьмедовнади партиядин обкомдин яшайишдин къуллугърин ва алишверишдин отделдиз регьбервал гана. Са кьадар вахт арадай фейила Зара Латифовадал Дагъустандин зегьметдин ва яшайишдин рекьяй еримлу хьунин министерство ихтибарна. Амма и къуллугъдал ам геждалди аламукьнач, ам Мегьарамдхуьруьн райондин кьиле акъвазна.
Алай вахтунда и бажарагълу дишегьлиди, Россиядин правовой академиядин Кеферпатан Кавказдин филиалда жегьилрин насигьатчи яз, гьакъисагъвиле зегьмет чIугвазва. Дагъустан абадлу, аваданлу хьунин рекье еке кIвалахар кьиле тухвай Зара Агьмедовнади алай йисуз вичин 75 йисан юбилей къейдзава.
«Лезги газетдин» редакцияди чи баркаллу ватанэгьлидиз цIийи шабагь ва юбилей рикIин сидкьидай тебрикзава.
«Лезги газет»
