Ватандин сергьятар хуьдайла телеф хьайи Россиядин Игит Радим Халикьован экуь къамат рикIел хуьнин лишан яз, волейболдай Сулейман-Стальский районда XV турнир кьиле фена. Ам ачухунин мяре­катда райадминистрациядин кьилин 1-заместитель Лацис Оружева, физический культурадин, туризмдин ва жегьилрин крарин рекьяй комитетдин кьиле авай Надир Эфендиева, образованидин управленидин начальник Къачабег Аминова, Игитдин стха Насир Халикьова, Кьулан СтIалрин ад­ми­нистрациядин векилри, Радим Халикьован тIварунихъ галай школадин аялри ва муал­лимри, общественностдин векилри иштиракна. Мярекат ачухдайла, Л.Ору-жева­ къейд авурвал, сергьятар хуьнин къуллугъдин капитан Радим Халикьова бандитрин еке дестедихъ галаз кьиле фейи женгинин гьерекатра викIегьвал, дирибашвал къалурна. РФ-дин Президентдин Указдалди адаз Россиядин Игитвилин тIвар, сергьятар хуьзвай 8 къуллугъчидиз “Дирибашвиляй” орденар гана. Р.Халикьо­ван тIварунихъ куьче, школа яна, школада Россиядин Игитдин музей ачухнава.

Турнирда Сулейман-Стальский, Дербент, Мегьарамдхуьруьн ва Хив районрай тир 8 командади иштиракна. Къизгъиндаказ кьиле фейи акъажунра Курхуьруьн команда гъалиб хьана. Адаз кубок, 1-дережадин диплом, пулдин пишкеш гана.

Турнирда 2, 3 ва 4-чкаяр, талукь тирвал, Агъа СтIалрин, Белиж поселокдин ва Хив райондин АрхитIрин командайри кьуна. Абур, гьакIни турнирда тафаватлу хьайи кьилдин спортсменар кубокриз, грамотайриз ва пулдин пишкешриз лайихлу хьана.

Хазран Кьасумов