Мегьарамдхуьруьн райондин пуд школа конкурсдин сергьятра аваз хкянава ва Дагъустан Республикадин Кьилин теклифдалди арадал гъанвай “150 школа” проектдик кутунва. Ам уьмуьрдиз куьчуьрмишунин нетижада Муьгъверганрин, Гъепцегьрин ва Хъартас-Къазмайрин хуьрерин умуми образованидин идараяр ремонтда.
РикIел хкин, “150 школа” проектди 2018-йисуз кардик кутур “100 школа” проект эвезнава. И проектди вичин нетижалувал тестикьарна, алатай йисуз, адан сергьятра аваз, республикада образованидин 117 идарада ремонтдин кIвалахар авунай.
РД-дин экономикадин ва мулкар виликди тухунин министерстводин делилралди, 2019-йисуз республикадин бюджетдай субсидияр къачуник региондин 47 муниципальный тешкилатди умуд кутунвай: 38 районди ва 9 шегьерди. Санлай къачурла, 251 проектдин документация агакьнавай.
Къейдна кIанда хьи, проект уьмуьрдиз куьчуьрмишун патал республикадин бюджетдай 30 миллион манат чара авун фикирда кьунва. Гъиле кьунвай кIвалахри школайрин материальный ва технический база цIийи хъийидай мумкинвал гуда. Проектдин бинедаллаз, шегьеррин ва районрин чкадин самоуправленидин идарайривай республикадин бюджетдай 2 миллион манатдив агакьна финансар къачуз жеда, гьа са вахтунда муниципалитетрин чпин бюджетри, гьич тахьайтIа, 5 процентдилай ва инвесторри — 15 процентдилай тIимил тушиз такьатар чара авуна кIанда.
«Лезги газет»
