Курхуьруьнвияр тир Аликберанни Ханперидин хизанди хуьруьн, райондин, республикадин абадвал патал еке зегьметар чIу­гуна. Ам несилар патал ватанпересвилин чешне я.

Фудуррин тухумдикай тир ви­кIегь хизанда Исрафил, Алисултан, Кьади, Айшат, Загьидат, Саният чIе­хи хьана. Абурукай Исрафил, Алисултан, Кьади Ватан душмандикай хуьз фенай.

Черниговский областда 1943-йисан 1-октябрдиз  барабарсуз са женгина гзаф хирер хьуникди Алисултан рагьметдиз фена. Ам и областдин Репкинский райондин  Рудня хуьруьн патав кучукнава. Жергедин аскер Исрафил гел галачиз квахьна. Кьади лагьайтIа, ­армиядиз дяведин гьа сифте йи­къара тухванай. Кьве стха телеф хьанвайдакай хабар хьайи ада душмандилай кьисас вахчуна. Мотострелковый частара къуллугъзавай ада, пулеметдай цIай гуз, цIуд­рал­ди фашистар къирмишна. Женгера къалурай дирибашвиляй Кьадидиз “Жуьрэтлувиляй” медаль ганай.

КIвализ ам 1947-йисуз хтана. Колхозда кIвалахиз башламишна. Адаз лежбервилин пешеяр хъсандиз чидай. Ам гагь калуз, гагь пала­са­диз, гагьни дугунизни салариз физ, ятар гуз векь ягъиз, техилар кIва­­тIиз, маркар эцигиз, датIана арабадин хиве ва  куьтендихъ жедай.  Тапшурмишай гьар са кар ада  намуслувилелди кьилиз акъуддай. Колхоздин правленидал адан тарифардай.

Кьадидин уьмуьрдин юлдаш Шагъади  дяведин йисара хуьряй Хасавюртдиз фейи къадалайни виниз итимринни дишегьлийрин жергедаваз душмандиз акси окопар, дерин хан­да­кIар, къанавар эгъуьнна. Хейлин чкайра танкариз акси ракьун даяхар (ёжикар) вичин гъи­ле­ралди акIур­на. Колхоздани техил, емишар, салан майваяр, не­кIе­дин продуктар гзаф гьасилуник ада вичин пай кутуна.

Кьадидинни Шагъадин хизанда Киров, Аликбер, Дадаш, Молла, Исрафил, Саният, Ханпери чIе­хи хьана. Абуруни хийирлу гзаф кIва­лахар авуна, техникадин ре­кьяй пешеяр къачуна, Ватандиз, диде — бубадиз вафалувал къалурна. Гьайиф хьи, 1975-йисуз Кьади ва 1995-йисузни Шагъа хизанривай къа­къатна. Рагьмет хьурай чпиз. Ри­кIин михьивилелди чIугур зегьметралди абуру хуьруьнвийрин рикIера экуь гелер туна.

Райсудин Набиев