Ахцегь
12-июндин йифиз хар, къати марф къуникди Ахцегь районда яшайишдин кIвалериз ва идарайрин дараматриз хасаратвилер хьана. Метеокъуллугъди яргъалди давам хьайи къати марфар кьадардилай кьве сеферда артух къвайиди къейднава. Завалдин асул къуват Ахцегьрин, Хкемрин ва Луткунрин хуьрерал ацалтна.
ТIебиатдин бедбахтвилерикди хсуси кIвалерал, идарайрин дараматрал яд акьалтна, хуьруьн майишатдин мулкариз, майишатриз зиянар хьана. Селлерикди республикадин ва чкадин метлеб авай шегьре рекьерни къайдадикай хкатна. Не-тижада улакьрин гьерекат акъваз хьана. Яд акьалтнавай кIвалера яшамиш жезвай ва чпиз зиянар хьанвай хизанриз МЧС-дин къуллугъчийри куьмекар гузвай. Селди Луткунрин хуьруьхъ галаз авай алакъа атIана, чкадин мектебдин са шумуд классдал яд акьалтна. Ахцегьрин ветуправленидин цларин патаривайни сел фена. Адан мулкариз ва аниз физвай рекьиз аквадай хьтин зиян хьанва: 0,5-0,6 гектардин чилин участок цик акатна, даяхдин цал къайдадикай хкатна. Ахцегьрин хуьруьн культурадин ва искусствойрин музейдин цлариз ва къавуз зиянар хьана, выставкайрин залра яд гьатна.
Завалдин чIуру нетижаяр вахтунда арадай акъудунин мураддалди 13-июндиз райондин кьил Осман Абдулкеримован регьбервилик кваз ЧС-дин заседание кьиле фена. Комиссиядин къарардалди, арадал атанвай гьаларин гьакъиндай РД-дин Гьукумат, республикадин МЧС-дин ва “Дагавтодор” карханадин руководство хабардарна, гьа са вахтунда хсуси къуватралди туькIуьр хъувунин кIвалахрив эгечIна.
Четинвилери инсанар сад ийида. ЧС-дин заседанидилай кьулухъ Осман Абдулкеримов вичин заместитель Алмас Шуаев, ГО ЧС-дин ва ЕДДС-дин управленидин начальник Сердер Моллалиев, райадминистрациядин крар идара ийизвай Вадим Агъасиев, коррупциядиз аксивал авунин месэлайрай райондин кьилин куьмекчи Митгьад Занчаров, Ахцегьрин хуьруьн кьилин заместитель Алмас Гьажиев галаз тIебиатдин бедбахтвилери ганвай зиянар тайинарун патал гужлу марфадин хура гьатай участокриз, хасаратвилер хьанвай гьар са кIвализ ва идарайриз фена. Иллаки еке зиянар хьанвайбуруз резервдин фондунай пулдин куьмек тайинарна. Алай вахтунда коммунальный къуллугъар желбуналди, рекьер селдин кьарадикай михьнава, электричестводалди таъминарун къайдадик кухтунва. ТIе-биатдин бедбахтвилер тамамвилелди арадай акъудун патал райондин руководстводин гуьзчивилик кваз ЧС-дин комиссияди кIвалах давамарзава.
Дашдемир Шерифалиев
Докъузпара
12-июндин йифиз хьайи къати гарари, хар какахьай къати марфари Докъузпара райондизни зиянар гана. ТIебиатдин завалдикди Мискискарин хуьруьн агьалияр электричестводикай магьрум хьана.
Кварцяй ичIирдай тегьерда къвайи гужлу марфарикди арадал атай селди “Мегьарамдхуьр-Ахцегь-Рутул” шегьре рекьин Мискискарин хуьруьн мулкарал ацалтзавай участок тухвана.
ТIебиатдин завалдин нетижада хьайи хасаратвилер арадай акъудун патал 13-июндин экуьнахъ фад “Докъузпарадин 14-нумрадин ДЭП” ОАО-дин къуллугъчийри тади серенжемар кьабулна. Лазим тир техника желбуналди, Мискискаринни Усугъчайдин арада авай шегьре рекьин участок туькIуьр хъувуна, улакьрин гьерекат сятдин 7-даз тамамвилелди гуьнгуьна хтуна.
Мискискарин хуьруьн администрациядин кьил Рузмедин Къенберова ихтилатзавайвал, шегьре рекьелай гъейри, хуьруьн къенепатан рекьеризни юргъади зиян гана, селди дигидай цин къанални къайдадикай хкудна. Хуьруьнвийрикай са агьалидин кIвализни юргъ атана, демекда авай верчерни кьена. Хейлинбурун салара цанвай затIарни селди тахьай мисална.
“Юргъади гзафни-гзаф рекьер чIурна. Дигидай цин къаналдин къвалав гвай рекьин 150 метрдин мензилдин участок винидихъай атай шимедив ацIана. Лазим тир техника авай хуьруьн карчидихъ галаз икьрар кутIунна, къенепатан рекьер чна са гъвечIи вахтунда гуьнгуьна хтуна. Юргъади зарар гайи чкаяр гуьнгуьна хтун патал герек жедай такьатрин умуми кьадар гьелелиг тайинарнавач, и месэладал кIвалахзава. Завалди гена инсанрин сагъламвилиз хасаратвилер ганач”, — къейдна Р.Къенберова.
Куругъли Ферзалиев
Кьурагь
Россиядин МЧС-дин Дагъустанда авай Управленидин пресс-къуллугъди хабар гайивал, 12-июндин йифиз къати марфар къуникди Кьурагь райондин КIутIул ва Штул хуьрерин арада авай шегьре рекьин бязи участокарни (100-200 метрдин мензилда) къайдадикай хкатна. Агьалийрин арада хасаратвилер хьайибур авач. Рекьин къайдадикай хкатнавай участокар 13-июндиз туькIуьр хъувуна.
Чи мухбир
