(Фельетон)

Вуч хабар я, малла Басир,

На цIийи паб вахчунани?

Куьгьне папан вуч тир тахсир?

Ам кьуьзуь яз акунани?

 

ЦIийи папав гвайни атир?

Ягъайвалди пIузарриз шир?

Вич асилдай ятIа къатир,

Женни адаз шивдин къадир?

 

Папа кIватIай къизилни пул

Вуна ваз гьикI авуна тулкI?

Тушир гьа ам къавахин кьул,

На капI авур, хаз кьуьзуь кIул.

 

Аялривай къакъудна фу,

Нин гуьгъуьниз катнава вун?

АкI тухариз жеч гьа руфун,

Сад Аллагьди гудач куфун…

 

На мискIинда кIватIай закат,

ЦIийи папаз гана савкьат.

Ви рикIелай гьикI фена зат?

Гьиниз фена ви капI — тIеат?

 

Туна лугьуз кьве къуз чуру,

Жеч гьа акьван крар айру!

ШейтIанриз на гана хуру,

Пайгъамбар бес яни турус?

 

Секин жеч гьа Аллагь -Таала,

Вун хьтиндан акваз гунагь.

Никай вуна кьада панагь,

Хьайила ви кьве кIвач куьлягь?

 

Тик дабанрин акунан зар,

Ачух хьунни муьфте базар?

Факъир, на ви кIасда пIузар,

Чир хьайивалд ви пис азар.

 

Аялри вун тадач кIвале,

Дар жеда ваз хайи магьле.

Ви тIес алай кьуьзуь келле

Цла жеда, фена зегьле.

 

Жегьил папаз ви ичIи гъил,

КIан хъжедач, неда гуьгьуьл,

Мад жагъурда вичиз са гъуьл,

Ахпа на квел ийида кьуьл?

 

КIелна лугьуз сад-кьве аят,

Гьакьван дегиш жедан ният?

Хизандиз къул авур кьегьат,

Ваз и чилел жедан регьят?..

 

Крар дуьз туш, малла Басир.

Заланди я вак квай тахсир —

Хайибуруз хьанва акси.

Низ хъийида на ви веси?

 

Пайгъамбарриз ийимир таб.

Я гатамир на жуван паб.

Эхиратдин къуз ви азаб

Жеда атIай гьа ви кьве яб.

 

Жегьеннемдин цIа жеда куз,

Туьхуьн тийиз йифиз-юкъуз.

Паб рикIел къвез, яд це лугьуз,

Амукьда, хва, хьана ялгъуз…

 

Амайд ятIа вахъ ви кьисмет,

Ахлад кIвализ, ая минет,

Куьгьне папав гва ви женнет.

Гьадан вилик гатут кьил-мет,

Белки, хгун ваз са муьгьлет…

21.04.19

Мердали Жалилов