И агьвалат алатай асирдин 60-йисара хьайиди я. Са агьваллу хизандин къуншидал фендигар, руьгьдиз михьи тушир дишегьли яшамиш жезвай. Ислягь зегьметдал машгъул яз, хъсандиз яшамиш жезвай къуншидал а фендигар пехил тир.
Са сеферда къунши патал алатайла, адан кIваляй пул, багьа шейэр квахьна.
Шак виридалайни вилик фендигардал фена.
Адани, квез михьивал кIанзаватIа, за ирид кас шагьидарни алаз, исятда мискIиндай пак Кьуръан гъана, кьин кьада лагьана.
Инал магьле кIватI хьана. КапI-тIят ийизвай шагьидрин вилик фендигар, михьи, лацу агъдик кутуна, винелайни къацу лентиналди тIвал янавай Кьуръан гваз хтана. Пудра темен гана, пелел эцигиз, вахчуна, ахпа, вичин эрчIи гъил эцигна, кьин кьуна, “михьивална”.
Вири мягьтел хьана. Иесини адахъ агъана, багъишламишун тIалабна…
И аламатдин эхирдай шагьидрикай сада лацу багълама ахъайна.
Адак квайди гьа вахтара Ростов шегьерда “Россельмаш” заводда акъудзавай хуьруьн майишатдин техникадикай кхьенвай яцIу ктаб яз хьана…
Фендигардин гъуьл комбайнер-тракторист тир. Беябур хьайи папа чуьнуьхнавай пул, шейэр чкадал хканай.
КIерецар — кьведазни
Зул алукьна, яр — емиш кIватIзавай октябрдин варз тир. Чун райондин хуьрерикай саниз, школадин гьалар ахтармишиз, методикадай куьмекарни гуз фенвай. И хуьруьн мулкуна тупIу хадай кьелечI хъире алай зурба кIерец тар авай. Школадин директор Селима, и тарцин яцIу пуналай са тIимил чкал аладарна, анал “Селиман тар” кхьена.
Чуьлдиз фена, и агьвалат акур, тарциз темягь авай Мирим муаллим мягьтел хьана.
Ам кIвализ хтана, якIвни дегьре къачуна, тамай руькуьнар, тIваларни гъана, таран кIаник квай чил элкъуьрна жугъундалди кIевирна…
Пакад юкъуз школадиз атай директорни муаллим къал хьана.
— Тар вид ятIа, чил зид я. Тарал аламайбур — ваз, кIвахьайбур — заз жеда! — лагьана Мирима.
Директор рази хьана. Маса рехъ авачир.
Рамазан Велибегов
