И йикъара Москвада, WaterShow-2019 лишандик кваз, шуьшейра цанвай ички квачир хъвадай ширин шейэр ва яд гьасилзавайбурун международный 18-форум кьиле фена. Ана Россиядай, Белоруссиядай, Къазахстандай, Украинадай, Эрменистандай, Латвиядай ва Литвадай тир и хиле зегьмет чIугвазвай 150 компанияди иштиракна. Кьве юкъуз давам хьайи ва гзаф программайрикай ибарат тир и форумдал шуьшейра цанвай циз талукь хилен кьилин темаяр ва месэлаяр веревирдна…
Форумдин сергьятра аваз, адет хьанвайвал, цин ва хъвадай ширин шейэрин аслу тушир дегустациядин 9-конкурсни кьиле фена. Нетижада 14 компания — къизилдин ва 7 компанияни гимишдин медалриз лайихлу хьана.
Шад жедай кар ам я хьи, къизилдин медалриз лайихлу хьайибурун арада Ахцегь райондин Хкемрин хуьре “Арран” тIвар алаз акъудзавай сагъламардай минеральный ядни ава.
РикIел хкин: шуьшейра аваз акъудзавай “Арран” яд 2017-йисан ноябрдилай маса гуз эгечIна. Къенин юкъуз ам Махачкъалада, Каспийскда, Дербентда ва Ахцегь районда туьквенрай маса къачуз жезва.
Чи мухбир
