23-майдиз Дагъустандин школаяр акьалтIарзавай  аялар патал эхиримжи зенг яна.  11 йисан вахтунда хайи маканриз  элкъвенвай мектебра чирвилер къачудай вахт выпускникар патал акьалтIнавайдакай  хабар гузвай зенг  анриз сифте камар къачузвай бицIекри саки виринра кьиле фейи шад мярекатрал яна. И юкъуз республикадин 12 агъзурдалай виниз выпускникри хайи мектебриз, рикI алай муаллимриз ва юлдашриз сагърай лагьана.

ЧIехи уьмуьрдиз камар къачузвай жегьилриз хуш сефердин, тебрикдин келимаяр  муаллимри, идарайрин регьберри, диде-бубайрини лагьана.

Мегьарамдхуьруьн  районда  алай йисуз эхиримжи зенг 11-классар акьал­тIарнавай  — 262 ва 9-классар куьтягьнавай 641 жегьил патал яна. Абурун арада Билбилхуьруьн  М.Абдуллаеван  тIварунихъ галай юкьван школадин 11-класс акьалтIарнавай — 13 ва 9-класс куьтягьнавай 28 выпускникни ава.  Абур патал эхиримжи зенгинин сувар, адет хьанвайвал, гурлудаказ кьиле фена. Ана хуьруьн, райондин администрацийрин, идарайрин векилри, гьуьр­метлу муаллимри, ветеранри ва маса мугь­­манрини иштиракна.

“Къе чи коллектив патал  гзаф шад югъ я — чна чи школа акьалтIарнавай жегьилар рекье твазва. Сифтени-сифте заз чи выпускникар тебрикиз кIан­зава — къуй абурухъ агалкьунар хьурай, рикIе авай мурадар кьилиз акъатрай, вилик квай государстводин нетижаяр кьадай аттестациядин имтигьанрай лайихлудаказ экъечIна, аттестатар вахчуна, кIелиз экечIна, хъсан ­пе­шекарар хьурай чи хуьр,  район, республика хкаждай, виликди тухудай. Чна квек еке умудар кутунвайди садрани рикIелай ракъурмир”, — лагьана Билбилхуьруьн юкьван школадин директор Тимур Саидова, выпускникрихъ элкъвена.

Имтигьанрин вахт, дугъриданни,  жегьилар-жаванар патал кьетIен важиблувал авайди я.  И кар абурун муал­лим­ри, диде-бубайри, чпини рикIе­лай ракъурзавач. Тимур Мурадовича, алатай йисара хьиз, цIини школадин аялривай   имтигьанар  лайихлудаказ вахкуз жедайдахъ инанмишвална, вучиз лагьайтIа, 11-классдал кьван кIе­лун да­вамардай къарар кьабулдайла, же­гьилри жавабдарвал тамамдаказ гьиссзава. Абуру и къарар тайин мурад аваз кьабулзава ва вилик эцигнавай макьсаддив агакьарун патал вири къуватар желбзава.

Школада кIелай йисарикай,  имтигьанрин муракаб вахтуникай  ва гележегдикай чна суьгьбетар авур  выпускникрин (ери-бине Билбилхуьряй я)  ихтилатри и  гафарин гьахълувал тестикьарзава.

Тайибов  Абумуслим, Билбилхуьруьн юкьван школадин 11 “б” класс:

“Къе зи рикIе авай гьиссер анжах шадвал кутадайбур я. Заз,  ЕГЭ-яр не­ти­жалудаказ  вахкана, вуздик экечIдай, ахпа  жуван руьгь тухардай, рикI алай пешедай кIвалахдай фикир ава. Аллагьдин куьмекдалди, заз адмирал Ф.Ушакован тIварунихъ галай гьуьлерин университетдик экечIиз кIанзава. Умуд кутазва, закай гимияр идара ийидай капитан жеда. Школада кIелун четин хьуникай рахайтIа, авайвал лугьун, за четинвилерикай садрани фикирдайди туш. Виликди, хъсан крарихъди­ ялна кIанзавайди я. Чи хуьруьн школа эцигна куьтягьнайтIа, хъсан жедай, гьикI хьи, виридалайни хъсан муаллимар чи школада ава, дараматни туькI­вейди хъхьанайтIа, мадни  агалкьунар жедай. Мумкинвиликай менфят къачуна, заз муаллимриз ва, кьилинди, чи жегьил директор Тимур Мурадо­вичаз чухсагъул лугьуз кIанзава — ам чи гъавурда гьатдай, чи агалкьунрихъ рикI кудай  кас я”.

Абдулвагьидова  Амина, Мах­ач­­къа­ла,  Ленинкент, 11-класс:

“Са патахъай чIехи жез кIанзава, муькуь патахъай, чIехибурун уьмуьрдиз вил  вегьейла, умудар гьаваянбур хьунин  къалабулухни ква. ГьикI ятIани, макьсад захъ авазва — уьлкведин медицинадин рекьяй кар алай вуздик экечIун. Заз духтурдин пеше гъвечIи чIа­валай хуш я. И макьсаддив агакьун патал за яваш-яваш, амма инанмишвилелди камар къачузва. Кьилинди  ла­зим тир чирвилер къачун ва нетижалудаказ имтигьанар вахкун я.  И кар патал лагьайтIа, сабурлувал, четинвилериз дурум гуз алакьун, къастунал кIевивал ва гьакъисагъдаказ зегьмет чIугун лазим я. ЕГЭ-дикай рахайтIа, зи фикирдалди, ада ученикриз хийир гъизвач,  гьикI хьи,  и ва я маса хел виликамаз хкягъайдалай кьулухъ аялри амай предметрай тарсариз гзаф фикир хгузмач, яни вири патарихъай савадлу кас хьун патал ЕГЭ-дин система къулайди туш”.

Хизриева  Камила, Махачкъала, 39-нумрадин лицей:

“Къенин юкъуз, школада кIелдай йисар кьулухъ хьайила, за дуьз рехъ хкянавайди гьиссзава. За лицейдин хи­миядинни биологиядин класс акьал­тIар­нава, гьаниз килигна, заз неинки и предметрай гзаф кьадар тарсарихъ яб акалдай, гьакIни университетдин преподавателрихъ галазни рафтарвалдай  мумкинвал хьана. Гьавиляй лугьуз кIан­­з­ава: образованидин системадин зайиф чкайрал зун гьалтнач. Гьелбетда, къейд тавуна жедач, вири крар чи гьевесдилай, къастунал кIеви хьунилай ва хкязавай рекьелай аслу я. За кIе­лай класс химиядинни биологиядинди ятIани, физикани гзаф бегенмиш тир. Гьаниз килигна, заз физикадин фа­культетдик экечIиз кIанзава. Ам акьал­тIарна, школада кIвалахда ва жу­ва кIватI­навай чирвилер жегьил несилривни агакьарда. Идалайни гъейри, заз студентвилин йисар виридалайни итижлу, хъсан вахт я лугьуз ван хьайи­ди я. Гьаниз килигна, университетда кIе­лунив эгечIдай вахт за еке ашкъидивди гуьзлемишзава. Школайра кIел­завай амай вири аялриз лугьуз кIан­зава: къуй куьн вири имтигьанрай агалкьунралди акъатрай. Уьмуьрдин рехъ хкядайла, жуван рикIихъ яб акала — икI куьн я ягъалмиш, я пашман жедач”.

Къуй квехъ экуь, хушбахтлу гележег хьурай, гьуьрметлу жегьил-жаванар!

Амина Муслимова