Пакаман кьиляй къени хабар агакьайла, вири югъ хъсандаказ кьиле фида, гуьгьуьлар ачух жеда. ИкI, и йикъара, пакамахъ компьютер кутурвалди, заз Дагъустандин Къизляр районда алай аямдин технологийрин жигьетдай СКФО-дин сергьятра виридалайни винизди тир чкадиз лайихлу прунз гьялдай завод ачухнавайдакай хабар хьана. И вакъиадиз талукь шад мярекатда РД-дин Кьилин патав Свердловск шегьердин лесотехнический институтда кIелай заз таниш кас гвай. Кьасумов Загьидин.
Ада хъсандиз кIелзавай ва ам спортдал машгъул хьун патал чи патав Свердловский партийный школадизни мукьвал-мукьвал къведай. За лагьайтIа, Свердловскдин высший партийный школада кIелзавай. Къе, 30 йис алатайдалай кьулухъ, заз ам Дагъустандин Кьилин патав аквазва. Загьидинакай гьакьван хъсан руководитель хьанва. И жигьетдай заз Свердловск шегьердин Лесотехнический институтдин преподавателриз хъсан образование гунай чухсагъул лугьуз кIанзава.
Республикадин Кьил “Нива” ООО-дин генеральный директор Загьидин Кьасумовахъ галаз санал цIийиз ахъайнавай карханада арадал гъанвай шартIарихъ галаз таниш жезвайди акурла, заз шад хьана.
Майишатда 22 машин техника, гьа жергедай яз 6 комбайн ава. Ам прунз гьялунин вири серенжемар кьиляй-кьилиз тамамарун (михьун, кьадардиз килигна паюн, кьурурун, цIалцIамарун, лазердалди фотосепарация авун, къапара тун) патал герек тир алай аямдин тадаракралди таъмин я. Ида прунз цадай майданар гегьеншардай мумкинвал гуда. Ихьтин хъсан кархана арадал гъанва чи ватанэгьлиди.
Лезги халкьдихъ лайихлу пешекарар гзаф авайдакай за гьамиша лугьузва. Инал заз лацу халатар алай ксарикайни рахаз кIанзава. Дагъустанда лайихлу духтурар авач лугьудай хабарар мукьвал-мукьвал пайда жеда. Кеферпатан Кавказдикай, иллаки Дагъустандикай СМИ-ри датIана чIуру хабарар раижда, чукIурда. Эхь, чIехи пай фикиррал чун рази я — кичI кутадай тегьерда авай ришветбазвал, халкьдин, уьлкведин хазина чуьнуьхун, бейкарвал…
Амма чахъ югъди-йифди государстводин хушбахтвал патал зегьмет чIугвазвай лайихлу ксарни ава эхир. ИкI, заз Мегьарамдхуьруьн райондин больницадикай рахаз кIанзава. Вуж вуж ятIа, жувал гьалтайла чир жеда. Инсанар кьиникьикай къутармишзавай и больницадин къуллугъчийриз, духтурриз, кьилди Р.Алибеговаз, М.Мегьамедоваз, И.Шириновадиз, М.Мисрихановаз, старший медсестра А.Ашуралиевадиз (ва амай вирибуруз) заз зи стха къутармишунай чухсагъул лугьуз кIанзава. Больницадин кьилин духтур Гьажибала Беглерован лайихлувилер, ада рикI куз хьайи тегьер (азарлуйрин гьалдал датIана гуьзчивалзава) заз кьилди къейд ийиз кIанзава.
Заз бегенмиш тахьайди тек са кар я — азархана техникадин жигьетдай таъминарнавай гьал. РФ-дин ФС-дин Государстводин Думадин депутат Н.Н.Езерскийдин куьмекчи яз, зун медицинадин идарайриз мукьвал-мукьвал акъатзава. Гьаниз килигна, лугьуз кIанзава хьи, техникадин рекьяй райондин больницадин таъминвал зайиф я.
Мегьарамдхуьруьн райондин больницадин вири духтурриз ва амай къуллугъчийриз мад сеферда чухсагъул.
Жалалдин Абдуразакьов
