Эхиримжи йисара адет хьанвайвал, 22-25-майдин йикъара Астраханский областда Вирироссиядин жинсинин лапагрин ва цIегьерин XX выставка кьиле фена. Дагъустандин патай мярекатда иштиракай делегациядик РД-дин хуьруьн майишатдин ва недай суьрсетдин министр Абдулмуслим Абдулмуслимов, и министерстводин са жерге отделрин начальникар, РД-дин хуьруьн майишатдин кооперативрин ва фермервилин майишатрин Ассоциациядин президент Абдурагьман Абуриков, Хипехъанрин милли союздин Дагъустанда авай векил Абдусалам Хожоков ва республикадин са жерге майишатрин регьберар квай.
Выставкадиз Россиядин Федерациядин 15 субъектдай шуькIуь ва юкьван жуьредин йис алай, векъи сарин, якIун ва некIедин 25 жинсинин лапагар, гьакIни туьк гъидай ва некIедин жинсерин цIегьер гъанвай. Мярекатдин программадин сергьятра аваз семинарар, илимдинни тежрибадин конференцияр, милли кIвалер безетмишдай жуьреда туькIуьрнавай майданриз килигунар, девейраллаз чамарар авун кьиле фена.
Дагъустан Республикадин патай выставкада 11 майишатди иштиракна: Гуниб райондай тир “Согратль” Агрофирма” СХК-ди, “Агрофирма “Чох” КХ-ди, “Милюб” СПК-ди, Хунзах райондин “ЧIехи ксар” ва “Стела” СПК-ри, Рутул райондай “Восток-2”, Казбек райондай “Алмак”, Къизилюрт райондай “Племсервис» ООО-ри, Буйнакский райондай «Архар» КФХ-ди, Ботлих райондин “Гурхел” ва Гумбет райондин “Мехельтинский” СПК-яр. Абуру выставкадиз тушинрин, андивийрин, лезгийрин ва Дагъустандин дагълух жинсерин (Андидин “лацу” ва “чIулав” жинсер) лапагар гъанвай.
Россиядин хуьруьн майишатдин минис-терстводин малдарвилин ва жинсерин кIвалахдин Департаментдин директор Харон Амерханова къейд авурвал, уьлкведа 2025-йисалди хипехъанвилин ва цIегьербанвилин хилер виликди тухунин стратегия туькIуьрда.
“Алай йисан эвелдин делилралди, уьлкведин вири жуьрейрин майишатра авай лапагрин ва цIегьерин кьадар 23 миллиондилай алатнава. 2025-йис алукьдалди чна абурун кьадар 25 миллиондив, диде хиперин кьадар лагьайтIа, 10-11 миллиондив агакьдайвал авуна кIанда”, — къейдна ада.
Дагъустандин жинсинин хипехъанвилин майишатри къизилдин — 9, гимишдин — 5 ва буьруьнждин 3 медаль (вири 17 медаль) къазанмишна.
А.Абдулмуслимова къейд авурвал, республикада лапагар куькардай промышленный центраяр арадал гъидай фикир ава. Асул гьисабдай абур дуьзенда жеда. Адан гафаралди, и месэладиз талукь ахтармишунардай проект алай вахтунда Ногъай районда кьилиз акъудзава, ина тахминан 1 агъзур лапаг хуьзва.
Министрди хабар гайивал, выставкадин сергьятра аваз кьиле фейи совещанидал малум хьайивал, уьлкведа хипехъанвилин хел виликди тухунин карда государстводи куьмек гуда, кьилди къачуртIа, лапагар маса къачун, яшайишдин кIвалер эцигун, мелиорациядин месэлаяр гьялун ва лазим къурулушар арадал гъун патал грантар чара ийида.
Амина Муслимова
