Ахцегь райондин Кахул хуьряй экъечIнавай ватанэгьлийри райондин кьиливай чпин хуьр цIийиз арадал хкунин месэлада куьмек гун тIалабна. И гьакъиндай «Лезги газетдиз» Ахцегь райондин администрациядин пресс-къуллугъди хабар гузва.
Важиблу месэла веревирдунин совещанида Ахцегь райондин кьил Осман Абдулкеримова, адан заместитель Мегьамедрауф Гъаниева, райсобранидин депутатрин председатель Абдул-Керим Палчаева, Ахцегь хуьруьн кьил Шемсидин Мерданова ва райондин администрациядин жавабадар къуллугъчийри иштиракна.
Кахул хуьр Цуругъ хуьруьвай 6 километрдин яргъа мензилда ава. Кахул хуьряй куьч хьайи агьалийрин чIехи пай къенин юкъуз Мегьарамдхуьруьн Гилийрин хуьре яшамиш жезва.
Совещанидин вахтунда са жерге месэлаяр веревирдна. Ватанэгьлийрин тIалабун кьилиз акъудун патал чIехи кIвалахар тамамарна кIанзава. Сифте нубатда агьалияр районда яшамиш жезвайбур яз документар туькIуьрун лазим я. Адалай кьулухъ райондин кьил О.Абдулкеримова къейднавай месэла кьилиз акъудун патал кIвалахдай десте арадал гъун ва гадарнавай хуьрер арадал хкуниз талукь, Дагъустан республикадин госпрограммадал бинеламиш хьанвай, муниципалитетдин махсус программа туькIуьрун теклифна.
Къейдна кIанда хьи, РД-дин кьил В.Васильева дагълух мулкариз куьмек гузва, дагълух муниципалитетар вилик тухунин проектар бажармишзава…
«Лезги газет»
